Copa America-a an match hmasa ber group stage match a Peru an hmachhawnna ah Brazil star player Neymar a che tha hle a nih kha. Goal hmahruai a khung bakah Douglas Costa pet goal turin mawi lutukin a siam sak zui bawk.

Neymar hian a club Barcelona chu trophy pathum lai season hman liam takah a chawipui bawka, Copa America ah bul a tan that chhunzawm lehzel avangin 2015 Ballon d’Or sawi rik a nih rualin Neymar pawh sawi lan a ni nghal ve zut ta mai.

Amaherawhchu inkhelh zawha South American reporters ten Ballon d'Or chungchang an zawhna chhangin Neymar chuan a dawngtu tur a chiang tawk tawh viau a ngaih thu a sawi a, Messi kuta awm ang tawh hialin a sawi.

Kumin a thiltih zawng zawngte en chuan a phu ber e, top-3 ah ka inhlangkai ve thei em ang chu maw tiin Neymar chuan a sawi chhunzawm bawk.

Ballon d'Or sem hnuhnun pahnihah Neymar a'n kumin atana dawng tura phu a tih Lionel Messi hian Real Madrid star Ronaldo a khum zo lova, amaherawhchu treble champion hial a club Barca a nihpui leh theih avang leh a form a that em avangin mi tam tak rin a ni mek reng a ni.