Borussia Dortmund forward Pierre-Emerick Aubameyan chu Confederation of African Football's player of the year award hlan a ni.
Gabon striker Pierre-Emerick Aubameyang hian vote 143 a hmu a, Manchester City midfielder Yaya Toure chuan vote 136 a hmu a ni. Confederation of African Football's player of the year thlannaah hian Caf member nations coach tinte leh technical director ten vote an nei a ni.
Kum 26 mi Aubameyang hi Gabon ram atanga he award dawng thei hmasa ber hi a ni a, Ghana midfielder Andre Ayew chuan vote 112 hmuin pathumna a ni. Aubameyang hian tun season kal mekah league game 17 atangin goal 18 a khung tawh a ni.
2015 bbc Africa player of the Year Yaya Toure chuan a zawnin Caf award hi kum li lo dawng tawh mahse kuminah Aubameyang a phak lova, 2015 khan Ivory Coast midfilder hian kum 20 hnuah a vawi khat nan a ram chu Africa Nations Cup a chawipui a, heti chunga Caf player of the year lawmman kumina a lak loh avangin Toure hi a lawmlo hle nghe nghe.
"A zialo ka ti hle mai, mahse sawisel erawh ka tum lem lo. Aubameyang ka lawmpui a ni, kum liamta khan a che tha em a ni," tiin Toure chuan a sawi. Africa Cup of Nations-a Ivory Coast champion puitu Herve Renard chu coach of the year-a thlan a ni a, ani hian 2012 khan Zambia enkawlin Africa Cup of Nations hi a lo chawipui tawh bawk a ni.
Africa ram chhung league-a player tha bera an thlan chu Mbwana Aly Samatta niin, he Tanzanian star hian a club TP Mazembe chu African Champions League title a lakpui a ni.