2015 a Footballer sum lalut hnem te (Part - 2)

18th June 2015, 09:06AM

Part 1 lamah top-10 chanve hnuailam tarlan a ni tawha, footballer hausa zual 5 te he part ah hian tarlan a ni e. 

Part-1 chhiar duh tan he sentence hi click mai tur aw:

5. Neymar (23-na) - $31m

Neymar nihna tak sawi dawn ila Brazil innghahna tih hian a sawi fiah ber mai awm e. Tunlai football khawvela attacking trio hlauhawm bera an sawi Barca attacking trio zinga pakhat niin season hman liam takah khan a thian Messi leh Suarez te nen Barca tan goal 122 zet an khunga, chung zinga goal 42 chu Neymar-a thun te a ni hlawm.

Ani pawh Falcao ang thovin sum hai luhah kumin hian a tla hniama, Forbes 2014 list a 16-na atangin 23-na ah a tla hniam a ni. Kum 23 chauha upa Neymar hian kum khatah $14m Barca ah hlawh a la a, endorsement atangin a hlawh aia sang $17m zet a lalut thung. Red Bull, Panasonic, Unilever, Volkswagen, Konami leh Beats by Dre te thawhpui mekin Nike nen inzawmna nghet tak an la nei reng bawk.


4. Gareth Bale (18- na) - $35m 

Season hman liam takah sawisel a tawk nasa hle a, goal 17 lai thun mahse 2013-14 season a phak loh bakah big game a beisei a phak loh thin avangin fans te lung a dum zo meuh lo. Amaherawhchu an sawiselna te avanga tlawm mai a duh bik lova, Real Madrid tan khelh chhunzawm zel Bale chuan a thlang.

British footballer hausa ber leh footballer man to ber Bale hian kum khatah $25.5m a hlawh heu mai. Endorsement atangin a hai lut nual bawka, $9.5m lai BT Sport, Lucozade leh Adidas atangin a lalut. 2014 khan Adidas tan contract $35 million hu kum ruk chhung atan a ziak fel ve leh tawh bawk.


3. Zlatan Ibrahimovic (14-na) - $39.1m

Season hman liam takah khan hliam leh buaina dang neuh neuh in tlakbuak mahse Ibra hian game 30 ah goal 29 a la khung thei tho a, Ligue 1 ah PSG champion puiin Champions League nomawi erawh a la chawi lo chhunzawm zel.

PSG hian hlawh an pe tha hem hem hle a, $33.1m zet Zlatan a hlawh atan hian an senga, hetiang zah zah player pakhat hlawh atana thehchhuak thei hi an tam lo khawp ang.

Endorsement lamah Dressman (Norwegian clothing chain), Volvo leh Xbox te a thawhpuia, kum 11 zet Nike a thawhpui tawh bawk. Heng atang hian $6m a hui ve a ni. Season tawp lamah khan Adidas F50 Adizero Boots a bun hmuh a ni a, season lehah Nike kalsanin Adidas a thawhpui dawn a ang ta hle.


2. Lionel Messi (4-na) - $73.8m

Ballon d'Or vawi li ngawt dawng thei Messi hian season a khar tha piap piap hle. Goal 60 leh assist 23 zet nei chunga season a khar thei khan treble champion an nihna kawnga a thawhhlawk zia chiang takin a tarlang awm e.

Kum hmasa khan Messi hian $64.7 million a neia, kumin ah erawh $73.8m zet a nei ta. 2014-15 season tan tirhah khan £16.3m zet hlawh theihna contract thar June 2019 thleng daih a ziaka, he contract ah hian a chet that dan a zirin bonus a la awm cheu. Amah sponsor tu Adidas, Audemars Piguet, PepsiCo, Gillette,Turkish Airlines leh Electronic Arts te atangin $20 million ai tam mah a lalut bawk.


1. Cristiano Ronaldo (3-na) - $79.6m

Season li chhung zet goal 60+ a khung theia, Real Madrid tan Ronaldo-a theihna hai rual a ni lo. $52.6m lai a pet goal theih manah (a ni mai aniang chu) hlawh an pe a, bonus pawh a awm ve lehzel. $24 million zet Nike atangin a lalut bawka, footballer zingah heng zat zat sum lalut thei an awm lo hrim hrim.

Tag Heuer leh Emirates Airline te endorsement lamah a thawhpui tel bawka, ama pualin underwear leh kawr CR7 line a nei bawk. Khawvela athlete lar ber tia sawi theih a ni a, facebook ah fans 102 million zet neiin, Twitter ah 35 million zet followers a nei bawk.

Part-1 chhiar duh tan he sentence hi click mai tur aw:

Copyright © inkhel.com 2024. All rights reserved.