2015 a footballer sum lalut hnem te (Part-1)

17th June 2015, 10:06PM

Forbes chuan kar hmasa lawk khan athlete sum lalut hnemte a puanga, sportsman zingah boxer hlawhtling em em Floyd Mayweather chu Forbes in he list a siam zinga sum hai lut hnem ber a ni.

Footballer zingah pawh sum lalut hnem fe fe an awma, top-100 ah footballer 15 zet an inhlangkai. He list Forbes magazine in a tihchhuahah zinga footballer sum lalut hnem zual sawm lo tarlang ve leh dawn ila. ***Bracket chhunga number hi Forbes list a an nihna hauh zat aw.

10. Luis Suarez (73-na) - $21m

Barcelona ah season khat chauh a hmang zo ve dek dek a ni a, chuti chung chuan khawvel mithmuhah striker tha a ni tih a lantir lo thiam lo a ni ber mai. Season hmasa khan inelna hrang hrangah goal 25 zet Barca tan a khunga, season tan tirh atanga hrem nghal ni mahse a goal khung zo zai te hian mi "special" a nihzia a pholang chiang kher mai.

Suarez hian a hlawh ngau ngau atangin $16.5m a laluta, endorsement atangin $4.5m a hui bawk. 888poker chuan World Cup a mawi lo taka a chet avang khan an thawhhona chhu chat mahse Adidas erawhin kian san mai harsa an la ti a, Adidas endorsement partner hraw berte zinga mi a la ni reng a ni. Pepsi fakna ah a inlan fo bawk.


9. Sergio Aguero (45-na) - $24.9m 

City in trophy chawi lovin season khar mahse an striker rinrawl Aguero erawhin a nuam tih ber goal khung ban zai a rel hleithei lova, league ah goal 26 teh meuh khungin season hmasa Premier League a pet goal hnem ber a nih phah nghe nghe. Season tan tirh khan 2019 thleng City a cham turin a contract a pawt seia, a contract ah hian £150,000 lai kar khatah a hlawh a ni.

£1.25 million zet Puma a thawhpuina atangin a hui luta, Pepsi, Gillette, Hugo Boss, Sony PlayStation leh Samsung te a thawhpui bawk nen Aguero hian $24.9m zet sum a nei heu mai.


8. Radamel Falcao (38-na) - $25.9m

Kum hmasa khan Falcao hi Forbes rich list ah 15-na a ni pha hiala, kumin ah erawh 38-na ah a tla thla ta duai mai. $32.4 million atanga $21.9 million a hlawh a hniam tak avangin he list a tlahniam ta duaia sawi a ni.

Season hmasa a beisei pahk lo tak Falcao hian Aguero ang thovin Puma a thawhpui a, Hublot, Gatorade, Samsung, Gillette leh Panini te a thawhpui tel bawk avangin $25.9m zet sum a la lalut tho a ni.


7. Wayne Rooney (34-na) - $26.9m

Man Utd captain Rooney hian sum hai luh lamah hma a sawn hle. Kum hmasa lama Forbes list a 43-na ni kha kuminah chuan 34-na a awm vang tawh nia. £250,000 zet kar khatah a hlawha, 2019 thleng United tana khel tura inziak Rooney hian kum nga leh a chanve a liam leh meuh £70m ai tam mah a nei tawh dawn a ni.

2011 leh 2012 ah te khan EA Sports leh Coca Cola te chuan Rooney an kalsan tawha, a (Rooney) brand hlutna kiam phah deuh mahse $26.9m zet a la hui lut tho a ni.


6. James Rodriguez (27-na) - $29m

World Cup a chet that hian kawng ro a su hle a ni tih nemnghet tu pakhat chu Rodriguez a ni. 2014 World Cup Golden Boot winner Rodriguez hian kum khatah $24.5m zet a inkhelhna atangin a laluta, €8.5m ($11.5m) zet endorsement atang ringawtin kumin hian a hai lut ngei tura chhut a ni bawk. Rodriguez hi Adidas nen thawk ho mekin Hugo Boss, Huawei leh Pepsi te pawh a thawhpui mek bawk.

Copyright © inkhel.com 2024. All rights reserved.