Europe top-5 league bika season hman liam takah khan record hrang hrang siam a ni leh nuala, kham lo takin season kan mangtha a nih kha. Premier League, La Liga, Bundesliga, Serie A leh Ligue 1 ah te inkhel hmuhnawm leh chanchin ngaihnawm tak tak kan hmuin kan ngaithla a, chutiang bawkin Champions League pawh kham lo takin kan thlah liama, season thar ngakin kan mit leh beng kan len leh thup tawh a nih hi.
La Liga-a goal khung tam ber Messi
Season liamta nikum November ni 22 khan Barca chuan Sevilla hmachhawnin, kha inkhelah khan record siama inkhel tur hrim hrima piang emaw tih mai tur Messi chuan hattrick a siam a nih kha. A hattrick zinga a goal hnihna kha record a siamna goal a ni a, La Liga a goal khung hnem ber a nihna goal niin record lo chelh tawhtu Telmo Zarra a khumna goal a ni ta a ni.
Zarra hian game 278 ah goal 251 khungin a record chu kum sawm ruk chuang zet a dinga, Messi chuan nikum khan a khum thei ve ta chauh a ni. Record a khum lai khan league game Messi khan a khel tam tawh zawka, amaherawchu goal dang khung chhoh belh zelin vawiinni thlengin goal 286 (315 apps ) zet a khung tawh a ni. He record hi tunhnai maiah chuan khum mai mai theih a nih a rinawm tawh loh.
Quadruple champions PSG
French team awm tawh zawng zawnga a hmasa ber atan PSG chu Ligue 1, Coupe de France, Coupe de la Ligue leh Trophee des Champions (Season tira an lak) ah te champion an ni a, quadruple champion niin season an khar a nih kha.
Season tirah Guingamp hnehin Trophee des Champions nomawi an chawi te te a, April thla khan Bastia chu final ah awlsam zeta hnehin Coupe de la Ligue title an la leh bawk. Auxerre hnehin Coupe de France an chawi leha, Ligue 1 ah season tluan deuh thaw Lyon in hma hruai mahse season tawp lamah an tawlh thlu a, PSG tan vanneihna a ni ta a ni.
Spanish club chak zawn rei ber Real Madrid
Nikum September thla atang khan Real Madrid record hi a intan a, UEFA Champions League a Basel 5-1 a an sawp zet hnuin inelna hrang hrangah match 21 dang hneh loh nei lovin hun an hmang liam chhunzawm. He record kalkawng an zawhna ah hian league game ah vawi 12, Champions League ah vawi 6, FIFA Club World Cup ah vawi 2 leh Copa del Rey ah vawi 2 tho an chak a ni.
An chak kaltluang lai chu league game ah Valencia chuan an tih tawp saka, goal hmahruai Valencia lakah hian Madrid chuan khung zet mahse hnehna an chan vawi 23 ni an tawng thei ta bik lo a ni. Record hmasa chelhtu chu Barca niin game 18 chhung an chaka, Brazilian team Coritiba chu world record chelhtu niin, anni hian vawi 24 zet a zawnin hnehna an chang.
Coppa Italia nomawi chawi ngun ber Juventus
Juventus hian season tha takin an khara, treble champion hial ni thei dinhmunah an inhlangkai. Serie A leh Coppa Italia nomawi chawia season an khar tak tho avangin treble champion ni ta lo mahse Juventus tan season tha tak a ni tho tho tih tu'n kan hai bik awm lo ve.
Juventus hian Coppa final ah Lazio chu hnehin a tum 10-na atan Coppa Italia champions an ni a, vawi kua lo champion tawh Roma lehpelin mellung thar an phun ta a ni. He inelna a an champion hnuhnun ber chu kum 1995 daih tawh khan a ni lehnghala, a hnu lamah final vawi thum lai lut leh mahse an tlawm fai veka, the Old Lady tan he inelna a an champion leh thei hi thil lawmawm tak a nih ngei a rinawm.
La Liga a hattrick siam tam ber CR7
December ni 6, 2014 khan Real Madrid chuan Celta Vigo chu si thum faiin an hneha, khata Madrid goal zawng zawngte kha Ronaldo thun te vek niin La Liga a hattrick a siam vawi 23-na a ni a, Liga a hattrick siam tam ber a nihna a ni chiah bawk.
Kumin March thla khan Messi chuan Rayo Vallecano lakah hattrick a siam ve leha, Ronaldo record rawn khum ve leh bawk mahse a hnu lamah Ronaldo a'n hattrick vawi li lai a siam belh ve lehzela, season a liam meuh chuan a hattrick record chu vawi 27 zetah a kai tir thei ta a ni.