£120 million contract in Lewis Hamilton a hmuak

21st March 2018, 05:03PM

Lewis Hamilton chuan tun kar hian Mercedes-ah contract thar a ziah beisei a ni a, a ziak a nih chuan British infiamna khawvela contract lian ber a la ni dawn a. Lewis hian £120 million contract a ziah a rinawm niin an sawi.

Formula One world champion hian contract a ziah atanga kum hnih chhung chu kum khatah £40 million a hlawh ang a, kum khat dang tih belh theih turin thu an dah nghal dawn bawk niin an sawi a. Kum 33 a upa Hamilton hian kar khatah £7,70,000 a hlawh dawn a ni.

Mercedes boss Toto Wolff chuan Chawlhni-a Melbourne khawpuia Australian Grand Prix tan hma ngeiin British driver Hamilton hi contract ziahpui hman a duh a ni.

British mi, F1 driver zinga hlawhtling ber, world title 4 nei tawh Lewis Hamilton hian season tan dawnah hian a hma angin a la tlin ang em tih hi a inzawt ziah tih a sawi a. Intlansiak nuam a tih em avangin a luhchilh leh nge nge thin niin a sawi.

“Intlansiak hi nuam ka ti a, chona hmachhawn thei tura keimah inbuatsaih hi ka la phur reng a. Hetih rual hian hetiang buaipui tur hian ka la tlin dawn nge dawn lo tih hi ka inzawt nawn fo thin,” tiin a sawi a.

A sawi zelnaah, “Beiseina karah inrinhlelhna a rawn intuh tel thin a, hetianga hma lam hun chiang nghal mai lo hi hmachhawn nuam ka tih chi tak mai a ni,” a ti bawk.

Champion lai Lewis hi Mercedes nen hian thla engemawzat an inbe chho tawh a, thutlukna an la siam fumfe thei lo a. F1 driver hlui, Channel 4 presenter ni ta, David Coulthard chuan hetianga contract an la ziah theih lohna hi chhan pahnih - pawisa leh hnathawh hun chhung chungchanga an la inrem theih loh vang niin a sawi.

Copyright © inkhel.com 2024. All rights reserved.