06 May 2020 06:17

inkhel

$1 million hlawha inhnek turin Mike Tyson an thlem

Mike Tyson chuan hun rei tak inhnek chawlhsan tawh mah se tun hnaiah $1 million hlawha inhnek leh turin an thlem mek.

Kum 53-a upa Mike Tyson chuan tun hnaiah boxing ring chhunga inlan leh a hreh loh thu a sawi chhuak a, kar thum kal ta vel atang khan MMA trainer Rafael Cordeiro kaihhruaina hnuaiah training pawh a nei chho tawh a ni.

California khawpuia Kings MMA head coach Rafael Cordeiro chuan boxing ring chhunga kir leh turin Mike Tyson chuan thla 5 bak a mamawh a rin loh thu sawiin, pay-per-view fight tha tak a neih leh theih ngei a rin thu a sawi bawk.

Promoter Brian Amatruda chuan boxing legend Mike Tyson hi exhibition match nei turin a thlem niin Cordeiro chuan a sawi a. A ruahman dan chuan ‘Baddest Man on The Planet’ hmaa ding thei tur hian rugby league player hlui Barry Hall emaw, Paul Gallen emaw, All Blacks legend Williams te chu chhawp chhuah a rilruk niin a sawi.

Brian Amatruda chuan, “Mike Tyson hi boxing ring chhunga inlantir leh ka duh a, duhthusamah chuan Melbourne Arena-ah inhnek thei se, entu mipui 10,000 chuang kan hui khawm theih ka ring a. A nih loh vek pawhin Jeff Fenech leh Azumah Nelson inhnek tuma mi 30,000 zet an kal khawmna Princes Park-ah a ni mai,” a ti.

“Tyson hi kum 53-a upa ni tawh mah se a hming hi a la langsar hle a, mi ngaihsan a la hlawh em em reng a. Hetiang a la nih avang hian Barry Hall, Paul Gallen, Sonny Bill tih vel chuan boxing ring chhunga hmachhawn theihna hun an neih phawt chuan phur takin an ding ngeiin a rinawm,” a ti bawk.

A sawi zelnaah, “Hetiang hun a thleng thei dawn a nih ngat chuan ropui taka huaihawt kan tum ang a, world title fight te nen kan ti ang a. Celebrity agent Max Markson ka be nghal a, Tyson chu $1 million hlawh thei tura thlem turin ka bia a ni,” a ti.

“Max hian 2012 kumah khan Mike hi Australia ramah a hruai a, an inkawmngeih hle a, hei vang hian $1 million a tawktarh chuan boxing ring chhungah hian a kir leh duh mai thei a ni,” tiin Amatruda chuan a sawi.