Roger Federer chuan World No. 1 nih chu thil hautak deuh mai a nih thu sawiin, a phur nazawng nih ngawt theih a nih loh thu a sawi a. Hetih rual hian Alexander Zverev chu he dinhmuna ding thei tura a duh ber thu a sawi.

Alexander Zverev hi Rogers Cup quarter final-ah a chak lo a, hei vang hian World No. 3 atangin No. 4 ah a tlahniam a, Juan Martin del Potro chu No. 3 a ni ve thung a. Roger Federer chu No. 2 a la ni zel a, mahse No. 1 Rafael Nadal nen chuan an inthlau rih viau a ni.

Kum 21-a upa German star Zverev hi player beieiawm berte zinga mi a ni a, Grand Slam title lak a la nei lo mai ni loin, a la thleng sang hleithei lo hle a. A tan chuan World No. 1 ni thei turin a kawng a la thui hle a, heti chung hian kar 300 zet World No. 1 lo ni tawh Federer chuan Zverev chu a chungnung berah a la awm theih tur thu a sawi.

Federer chuan, “World No. 1 hi a la nih theih ngei ka ring a. A khelh dan atang hian a la thlen san zel hi ka beisei tak zet a, tun ai hian nasa takin hma a sawn belh dawn tih a hriat,” tiin a sawi a.

“Ni tin a inzir thar zel ang a, tun ai hian a chak belh zel ang a. Hei hi thil nih dan phung pangngai a ni a, tuna a dinhmun ai hian a ziaawm belh zel dawn a. Kum 40 a tlin hunah chuan tlem tlemin a tlahniam ve tan ngei dawn a ni,” a ti bawk.

A sawi zelnaah, “No. 1 han nih tak hi chu thil hautak zet mai a ni a, duh duha nih theih pawh a ni lo a, a phur nazawng nih theih pawh a ni hek lo a. Hetiang dinhmuna ding thei tur chuan thil tam tak pawimawh deuh deuh a awm a, teirei peihna te, in fit reng te, rilru paukhauh tak neih te a pawimawh a ni,” a ti a.

“Tunhma atanga World No. 1 ni thei te kan thlir let chuan mi tam tak an ni miah lo a. A thiamna ka en hian Alexander Zverev pawh hi World No. 1 ni thei tura beisei a ni a. Chutiang dinhmunah chuan a din theih ngei ka duh a ni,” a ti.