Real Madrid a zawna vawi thum Champions League lakpuitu Zinedine Zidane chu kum 17 hnuah a club hlui Juventus-ah a kir leh dawn niin a lang.

Zidane hi a let a nih pawhin manager tur ni lovin, Sporting Director ni turin a let dawn a, Turin club Sporting Director ni mek Fabio Paratici nen an thawk dun dawn a ni.

Fabio Paratici hi tunah hian Beppe Marotta nen an thawk dun meka, Cristiano Ronaldo an lakluh chungchangah pawh an pahnih hian mawhphurtu ber an ni.

Zidane hi Juventus-ah a khel thin a, a hunlaia player man to ber niin kum 2001 khan euro maktaduai 77.5-in Real Madrid-in an lei chhuak.

nkhel a chawlhsan hnuah Real Madrid enkawlin a hlawhtlinpui hle, tumahin Champions League a zawna an lak theih loh laiin France captain hlui hian a zawnin vawi thum lai a lakpui a ni.

Juventus-ah hian game 209 khelin goal 31 a khunga, kum 1998 khan Ballon d’or award a lo dawng tawh bawk a ni.

Zidane hian Real Madrid a chhuahsan hnuah Juventus hian Cristiano Ronaldo an lalut a, tunah hian Zidane hi an lalut leh dawn niin a lang.