​Zarkawt BCA in Champion lai Khatla TBL an sawp

01st April 2017, 08:04AM

Zarkawt BCA hian an match hmasa berah mizo hlangin Tuikual South 89-87 in an hneh a, March ni 31, Zirtawpni zan khan an match hnihnaah Khatla TBL hmachhawnin, Zarkawt BCA hian 67-51 in Champion lai Khatla TBL an hneh a ni. Big match en tur hian Hall khatin Basketball ngainatu mipui an pungkhawm leh bawk.

Zarkawt BCA hian April ni 4, Thawhlehni zanah Mission Veng Vikings an hmachhawn leh ang a, Khatla TBL hian April ni 6, Ningani zanah Zarkawt Serpents an hmachhawn thung ang.

Zarkawt BCA tan Dennis Vanlalmuana, Mathew Remtluanga Sailo, Henry Lalramngaihawma leh Zonunsanga te an thawh hlawk hle, State pawn atanga an player lak Amritpal Singh leh Yadwinder Singh te erawh an chakna hnar an ni chiang hle, tun season chu chhuk vawm a lar hle, third quarter-ah an pahnih hian an dunk ve ve a ni.

Khatla TBL tan state pawn player Garry Gill leh coach cum player H Laldinsanga (Mapui) bakah Vanlalmuana, Gospel Lalthawmmawia, Vanlalnunsanga leh Eddie Zaithanmawia te chu khel tha pangngai hle mahse BCA dang turin an thawh hlawk em em hran lo, an state pawn player Garry Gill chu a damsam lo tih a lang chiang hle bawk a, Zarkawt BCA player Amritpal Singh leh Yadwinder Singh te an chungnung em a, TBL hian an chelh lo a ni ber mai. Garry Gill hian third quarter-ah a chhuk vawm ve bawk a ni.

BCA tan hian an state pawn player-te pahnih langsar hle mahse an point guard Zonuna a langsar fal hle, point 11 lai khungin rebounds vawi 5 a lak bakah assists vawi 7 a nei a, an khingpuite ball vawi 7 ngawt a chhuhsak bawk a ni.

Quarter hnuhnung berah Zarkawt BCA tan Amritpal Singh leh Yadwinder Singh chuan an thawhhlawk hle a, rebound an la thei a, Yadwinder Singh chuan point 8 lai score a nei a ni. Khatla TBL tan Mapuia leh Eddie Zaithanmawia te thawhhlawk viau mahse, Zarkawt BCA state pawn player Amritpal Singh leh Yadwinder Singh te an dang zo lo. Hun a tawp meuh chuan Zarkawt BCA chuan 67-51 zetin hnehna an chang a, BCA hian an that zia an lantir a, team engpawh hmachhawn se hnehna chan theihna squad an nei tih a lang chiang a ni.

Inkhel pumpui thlirin BCA an khel tha zawk a, an khelh that zawk theihna chhan pawimawh tak chu player an neih that vang a ni. Inter State player Amritpal Singh leh Yadminder Singh an tangkai a, TBL lamin Gary Hill kawl ve mahse BCA lakah thlawptu a nei tha tawk lo. BCA lamin an match hmasa berah Inter State player nei tha ber pawl Tuikual South chu Mizo player hlangin an hneh thei a, Amritpal leh Yadminder an kawl tawh avangin Zarkawt Veng Club hi MSL 3 title contender an ni kan ti thei ang.

Season hmasa pahnihah TBL elphak tak tak an awm lo kan ti thin a, MSL 3 a nih meuh chuan Khatla veng club hian Inter State player tha an mamawh tih a lang chiang hle. Mizo player nei tha viau mahse Amritpal lakah Eddie Zaithanmawia, Gospel Lalthawmmawia leh PB Vanlalmuana-te'n chet ngaihna an hre lo. H.Laldinsanga(Mapuia) thluaka innghat thin TBL hian Mapuia thluak bakah Inter State player tha an mamawh a, MSL 2 a TBL champion puitu Vishesh Bhriguvanshi an la dawn nia sawi awm mahse an la inbefello niin a lang. Hetih lai hian TBL hian state pawn player tha tak an nei vat dawn tih chu inkhel.com chuan a hre ru a ni. TBL hian MSL 3-a an champion nomawi humhim an duh a nih chuan an insiamthat vat a ngai ang.

Mimal che tha te:-

Zarkawt BCA:

Yadwinder Singh: Score 15, 3points 2, Rebound 3.

Amritpal Singh: Score 12, Rebound 9, Block 2, Steal 2.

Dennis Vanlalmuana: Score 16, 3points 3, Rebound 9.

Zonunsanga: Score 11, 3points 3, Rebound 5, Assists 7, Steal 7.

Khatla TBL:

H Laldinsanga (Mapuia): Score 18, Block 2, Steal 5.

Garry Gill: Score 15, Rebound 12, Block 1.

Reporter: PC Lala

Copyright © inkhel.com 2024. All rights reserved.