Zanin hian 2018 World Cup semi-final hmasa zawk khelh a ni dawn a, France leh Belgium-ten an khel ang. Final ai pawha hmuhnawm zawk tura ngaih a ni a, team hnihte game a hmuhnawma, player an nei tha a, an intum tawk viau a rinawm.
Zanin dar 10:45 vel atangin programme live tan a ni dawna, kick-off hi dar 11:30 a ni ang. St.Petersberg khawpuiah St.Petersberg Stadium-a khelh a ni dawna, Uruguayan referee Cunha Andres-a’n inkhel a vil ang.
Inkhel tur pahnihte hi an che tha hle a, World Cup-ah hneh loh an la nei lo ve ve a, Belgium hian tumpuite an la hnek veka, France erawhin Denmark an draw pui tawh thung. Semi-final thleng tur hian France hian round of 16-ah Argentina an hneha, quarter-final-ah Uruguay an hneh bawk. Belgium hian round of 16-ah Japan an hneha, quarter-final-ah Brazil an pet tlain semifinal-ah an hmun an hauh.
Belgium hi kum 30 hnua semi-final an thlen leh vawikhatna a ni a, France hian World Cup nomawi hi vawikhat an chawi tawh thung. Ram hnihte hi ram inthenawm an ni a, an intum ngun tawh hle, France hian Belgium hi ram dang zawng aiin an hmachhawn zing tawh a, vawi 74 lai ram hnihte hi an in hmachhawn tawh. World Cup bikah hian tum hnih chiah an la inhmachhawna, an inhmachhawn hnuhnun ber chu 1986 World Cup-a third-place an inchuh tum kha a ni.
Sawi hmaih loh tur pakhat a awm a, France legend Thierry Henry chu tunah hian Belgium coach Roberto Martinez-a hnuaiah second assistant coach hna a chelh meka, an ram France an hmachhawn dawna, field-a awm ve a duh dawn nge duh dawn lo tih pawh hi ngaihtuah tham tak a ni.
Belgium hian an right-back Thomas Meunier chu yellow vawi hnih a hmuh tawh avangin an chhawr thei dawn lova, coach Roberto Martinez-a’n a defence a siamrem a ngai dawn. France lam hian khel thei lo tur an nei lova, quarter-final-a suspension vanga inlan thei lo Blaise Matuidi an chhawr thei tawh dawn thung a ni.
Defence lama an player pawimawh tak, an right-back neih chhun a khelh theih dawn loh avangin Roberto Martinez hian engtin tak nge a team hi a rem dawn a hriat loh. An formation pangai 3-4-3 nge a hman anga 3-5-2 nge a hman dawn a hriat lohva, defence-ah pali dah lehin, 4-3-3 a rawn hmang leh thei bawk. An panna lai ber hi full-back/wing-back hi a ni a, Meunier ber kher a khel thei lo tur hi an buai phah viau maithei. Mahse an coach Martinez hi Premier League a awm lai pawha, tactician tih deuh bik kher thin kha a ni a, Brazil lakah pawh a tactic a thlak danglama, Brazil an hneh a nih kha. Round of 16-a Japan an hmachhawn tum pawhin Belgium hi an chaklo mai dawn emaw tih laiin an coach-in substitution-te a siama, tactic-te thlak danglamin si hnih an phurh hnuin Japan chu 3-2 in an lehthal leh bawk.Chuvang chuan ngaihdan tha tak a neih leh ngei pawh a rinawm. Spanish mi Martinez hian defence-ah pali a hman dawn chuan Alderweireld hi right-back-ah hmangin Kompany leh Vermaelen –te a laiah a inkawp tir anga, left-back-ah Vertonghen pawh a dah thei a. 3-4-3 formation a hmang dawn a nih chuan wing-back –ah Carrasco leh Chadli-te a dah a rinawm.
France lamah buaina tur a awm lova, Deschamps hian tactic a thlak dawnglam dawn a nih loh chuan a ngaia an inrem leh rin a ni.
Predicted lin-up :
France – (4-3-3) Lloris, Pavard, Umtiti, Varane, Hernandez, Kante, Pogba, Matuidi, Griezmann, Mbappe, Giroud.
Belgium – (4-3-3) Courtois, Alderweireld, Kompany, Vermaelen, Vertonghen, Fellaini, Witsel, Chadli, De Bruyne, E.Hazard, Lukaku.
Sawi tawh angin final ai pawha a hmuhnawm a rinawm a, Mbappe, Pogba, Greizmann, Hazard, De Bruyne leh Lukaku-te ho in theih tawp chhuahin final thlen tumin an bei dawn a, a hmuhnawm lo thei lo a ni.