​YMA Football Tournament: Ramhlun 'S', College Veng leh Chanmari ten Semifinal an lut

13th June 2017, 09:06PM

Central YMA leh Mizoram Football Association (MFA) tangkawpin an buatsaih TT Royte Trophy Inter Branch YMA Football Tournament 2017 chu June ni 13, Thawhlehni khan quarter final khelh chhunzawm a ni a, inkhel vawi thum awmin Ramhlun South, College Veng leh Chanmari chuan an khingpui theuh hnehin semifinal an lut ta a ni.

Chhum zing vang a inkhelh hun sawn tho Chhinga Veng leh Salem Veng te hian June ni 16, Zirtawp zing dar 7:00 AM-ah Rajiv Gandhi Stadium-ah an khel ang a, semifinal lut a hriat kim tawh ang. Semifinal hi double leg-a khelh tur a ni a, 1st leg hi June ni 19, Thawtanniah khelh tan tur a ni a, 2nd leg hi June ni 21, Nilainiah khelh leh tur a ni.

09:00 AM Ramhlun South 1-1 ITI

(Vanlalthlamuana 56') (Vanlaltlawmlova 71')

(Penalty shootout-ah Ramhlun South 5-3 in an chak)

Chhum zing vang a an khelh hun tih dang lam Ramhlun South leh ITI Veng chuan an khelh hmabak minute 29 an khel leh a, hun pangngaiah 1-1 a anin hneh tawk hnuah penalty shootout-in chak zawk zawn a ni a,  Ramhlun South chuan 5-3 in hnehna an chang a, semifinal an lut ta a ni.

Goal lut hi second half-a lut ve ve a ni a, Ramhlun South tan Minute 56-ah Mawitea ball vawrh tha zet chu box chhunga awmThlamuana chuan chiang zetin a chhuih goal-a,  Minute 71-ah ITI Veng tan Lalropuia goal shoot tha zet chuan goal kham a per hlauh ball lo let leh chu Vanlaltlawmlova chuan chiang zet a pet goal-in an siphurh a rul a, goal dang luh belh lo in hunpangngaiah 1-1 in anin hneh tawk ta a ni.

Penalty shootout-in chak zawk zawn a ni a, Ramhlun South tan a pet tu ten an pet goal vek laiin ITI Veng tan David Vanlalkima chuan a pet goal lo thung a, Ramhlun South chuan 5-3 in hnehna an chang ta a ni.

11:00 AM College Veng 4-3 Chaltlang

(KC Lalruatkima 30', KC Lalchhuanmawia 35', R Laldanmawia 71', (p) 81') (Lalhriatpuia 19', 25' Malsawmzuala 33')

Inkhel tan a ni a, Chaltlang chuan inkhel thu nun zawkin minute 19-ah Lalawmpuia ball vawrh tha zet chu box chhunga awm Lalhriatpuia chuan pet goal-in an hmahruaina goal-a khung a, minute 6 a ral leh hmain Lalhriatpuia bawk chuan an goal hnihna a khung leh nghal zat bawk. College Veng chuan an sihurh sut tumin an nawr let ve thung a, minute 30-ah KC Lalruatkima (Kim Kima) chuan an goal khatna khung ve bawk mahse, minute 3 aral leh hmain Chaltlang tan Malsawmzuala chuan an goal thumna a khung leh nghal zat bawk. Minute 35-ah College Veng tan KC Lalchhuanawma (Kca) chuan free kick an hlawh chhuah a tangin an goal hnihna khung mahse, Chaltlang chuan 3-2 a hmahruaiin chawlh lawk an hmang ta a ni.

Second half tan a ni a, College Veng chuan an siphurh sut tumin an nawr thung. Minute 71-ah penalty anhlawh chhuah chu Danmawia chuan pet goal-in an siphurh a sut a, College Veng chuan nawr chhun zawmin minute 81-ah Danmawia bawk chuan an goal li na khungin College Veng chuan 4-3 in hmaanhruai thung. Hun tawp dawnah intih buai vangin College Veng player Edenthara leh Chaltlang player Caleba hnawh chhuah an ni. Chaltlang chuan an siphurh sut tumin nawr let mahse goal erawh an thun thei thawh lo. College Veng chuan 4-3 in hnehna an chang ta a ni.

01:30 PM Hualngohmun 1-2 Chanmari

(Ramdintluanga 87') (Lalnunzama 68', Lalhriatpuia 84')

Inkhel hnuhnung zawk Chanmari chuan 2-1 a Hualngohmun hnehin semifinal an lut ve bawk.

Goal lut te hi second half-a lut an ni a, Chanmari tan minute 68-ah Rosangliana thawhrah sengin Lalnunzama chuan goal hmahruai a khung a, minute 84-ah Lalhriatpuia chuan an goal hnihna a khung leh bawk. Hualngohmun chuan an siphurh sut tumin an nawr let thung.  Huntawp nan minute 2 ala awmin Vanlalthanga ball vawrh luh tha zet chu Ramdintluanga chuan pet goal-ah chantir mahse an siphurh an sut thei lo thaw lo. Chanmari chuan 2-1 in hnehna an chang ta a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.