WTA Finals khelh mekah Karolina Pliskova chuan Wimbledon champion lai Garbine Muguruza a hneh a, semi-final lut hmasa ber a ni.

Kum 25 mi Pliskova hian 6-2, 6-2 in Muguruza hi a hneh a, heti hian White Group-ah hma a hruai chiang ta a game khat khelh hmabak la nei mahse umphak theih a ni tawh lo.

A chak hnuin Pliskova chuan, "Qualify hmabaka khel leh tur ka ni tawh lo hi ka lawm khawp mai, nikum khan qualify hmabakin group match-a ka game hnuhnung ber ka khel a, a hahthlak."

"A zawna game tam vak lo ka chak zawn hian ka lawm thei hle a inrintawkna min pekbelh bawk. Group match game khat khelh tur la awm hi nuam ti taka khelh ka duh a, chak lo tur lam ni lovin tennis hi nuam taka hman ka duh." tiin a sawi.

Inkhel dangah Venus Williams chuan 7-5, 6-7,7-5 in French Open champion lai Jelena Ostapenko a hneh a, darkar thum leh minute 13 an inkhel.

Kum 37 mi Williams chuan, "Chak chu chak a ni mai a, hei hi ka sawi theih tawk a ni. Ka vannei deuh pawh a ni maithei e, mahse khelh hmabak ka la nei." tiin a sawi.

Red Group-a awm World number one Simona Halep chuan Nilaini hian Caroline Wozniacki a hmachhawn dawn a, Elina Svitolina leh Caroline Garcia-te pawh an in hmachhawn ve dawn bawk a ni.