11 Jul 2018 07:04

inkhel

World title lak belh tumtu Mary Kom

Indian boxer ropui MC Mary Kom chuan World Championship title lak leh ngei a tum thu sawiin, chutiang ti thei tur chuan rilru nei takin a inpuahchah chho niin a sawi.

Mary Kom hian World Championship title hi vawi 5 a lo la tawh a, kuminah a vawi 6-na atan champion leh ngei a tum hle a. A dar a tihnat avangin Asian Games-ah khan a tel thei ta lo a, mahse November thla khian New Delhi-ah World Championship a awm dawn a, hetah hian title lak ngei a inbeisei a, tun atangin a inpuahchah tan a ni.

Kum 35-a upa Mary Kom chuan, “Thil pakhat ka sawi chian theih nghal chu ka inhliam a nih ngawt loh chuan training naah 100% in ka bei ang a, hetianga ka tih chhoh ngat chuan World Championship title hi ka la ngei ang tih ka sawi ngam a. Eng thil emaw a rawn thleng a nih chuan ka sawi thei lo a, engkim a tluang chho a nih chuan ka champion ngei ang,” a ti.

“World Championship atan hian ka inpuahchah tan tawh a. Kum ruk, kum sarih vel kalta kha chuan vawi khatah darkar hnih, darkar thum te training kan nei thin a, tunah chuan khatiang kha a ngai tawh lo a, engkim hi darkar khat velah kan ti thei vek tawh a. Taksa fit that hi a pawimawh em em a, chu vangin kei pawhin rilru nei takin training hi ka tih chhoh a ngai a ni,” a ti bawk.

Tunlaia hmeichhe boxer te dinhmun sawiin Mary chuan Gold Coast Commonwealth Games-a India hmeichhe boxer te’n medal an dawng ta lo chu pawi a tih thu a sawi a. Boxer te an that ngaihtuahin medal an hawn ta lo kha an vanduai vang liau liau nia a ngaih thu a sawi.

“Training an bei ngawrh hle a, an thawkrim em em bawk a, chuti chung chuan medal an hawn thei ta lo a, an vanduai vang ka ti lo thei lo a. Asian Games-ah pawh tha taka an khelh theih ka duhsak a, medal tam thei ang ber la turin ka duhsak hle a. Pawl pawhin heng boxer te tana tha ber tur an ngaihtuah nasa hle a ni,” a ti.

Mary Kom chuan, “Ram tana inkhelh ka la tum zel chhan chu India tana medal lak hian min tiphur a, ka tan chuan a aia fuihna tha a awm chuang lo a. Ka khelh theih leh theih loh ka inzawt ngai lo a, eng vangin nge ka theih loh ang tih hi ka inzawh fo zawk chu a ni,” tiin a sawi.