World Senior Karate Championship-ah Zonunmawii a tel dawn

25th October 2016, 01:10PM

Khawvela Karate sports intihsiakna lian ber Linz, Austra-a neih tur World Karate Federation (WKF) buatsaih 23rd WKF World Senior Karate Championship 2016 chu October ni 26-30, 2016 thleng neih a ni dawn a, he inelnaah hian India aiawha tel turin All Mizoram Karate Association (AMKA) player Mizo nula Zonunmawii Lianpui Champhai District chu a tel dawn a ni.

Zonunmawii hi National Senior Karate Championship hnuhnung bera a achievement atangin Karate Association of India (KAI) chuan India aiawha 23rd WKF World Senior Karate Championship 2016-a khel turin a rawn thlang a, Senior Women +68 kgs category-ah a khel dawn a; a kehlhna tur category-ah hian ram 59 zet in-register an awm tawh a ni.

Zonunmawii hi AMKA Technical puipa ber Shihan C.Dosavunga, Karate Black Belt 5th Dan, Asia Accredited Coach & National Referee chuan training apek bakah Mizoram State Sports Council Gym Expert-te pawhin uluk taka hrualin an enkawl bawk.

October ni 26 hian nilengin elimination round an khel ang a, October ni 29-ah Bronze Medal inchuhna leh final khelh a ni dawn a ni.

Zonunmawii hian October ni 24, Thawhtan tlai khan IGI Airport, New Delhi atangin Linz, Austria panin India ram a chhuahsan tawh a, amah thlahna hunah hian AMKA President Pu R.Zomawia chuan, World Karate Championship-ah hian tunhma deuh khan Junior leh Cadet player mipa pahnih India aiawha an lo tirh chhuah tawh thu leh, Senior player erawh chu tun tum hi World Karate Championship-ah Mizo Karate player feh chhuah vawi khatna a nih thu a sawi a ni.

AMKA General Secretary Pu T.C.Lalremsiama chuan, Zonunmawii’n World Senior Karate Championship 2016 a khelh theih nan a senso ngai zatve chu Mizoram State Sports Council (MSSC) chuan an tumsak bakah Zonunmawii khua Lianpui bialtu MLA zahawm tak Pu T.Sangkunga chuan senso ngai indaih lohna phuhrukna tur Rs. 30000/- zet mai chu ngaihtuahsak bawk.


(adsbygoogle = window.adsbygoogle || []).push({});

Copyright © inkhel.com 2024. All rights reserved.