​World no 1 thar Murray

06th November 2016, 05:11PM

Andy Murray chu khawvela mipa tennis thiam ber thar a ni ta a, Serbian star Novak Djkokvic chungah awmin World no 1 thar a ni ta e. Murray hian no 1 thar ni turin BNP Paribas Masters khelh mekah final luh a mamawh a, semi final-a a hmachhawn tur Milos Raonic a inhnuhdawn takah chuan awlsam takin final a lut ta a ni.

Kum 1973 atanga ranking mumal tak siam a nih hnua British mipa world no 1 ni leh thei hmasa ber Murray chuan, "World no 1 nih hi ka inbeisei ngai lo hrim hrim. Tun dinhmun thleng tur hian kum tam tak rim takin ka thawk a, ka khelhpui player-te an tha bawk nen a harsa hle a ni," tiin world no 1 ni tura a thawhrim thu a sawi. Murray hian Roger Federer leh Rafael Nadal mai bakah Novak Djokovic vanglai a nang hman a, an ni pathum hi awm lo ngat sela chuan Murray Grand Slam tam zawk a chawi ngei ang.

Murray hi kuminah a che tha em em a, Wimbledon champion a nih mai bakah Olympic-ah gold medal a la bawk. Tournament a khelh 12 atangin vawi 11 zet final a lut a, kumin chhungin tum 73 zet hnehna a chang tawh bawk. Murray hi thawhtannia rankings thar ber an tarchhuah hunah official takin world no 1 a ni dawn a ni.

Copyright © inkhel.com 2024. All rights reserved.