16 May 2018 11:23

Inkhel

Mizo Sports Website hmasa ber

​World Cup Special : Jules Rimet Cup

June 14 -15 July, 2018 a khelh tur FIFA World Cup hi World Cup vawi 21-na tur chiah a ni a. Russia-ah khelh a ni dawn a, Eastern Europe-in a vawikhat thlenna tur a ni nghe nghe. 2018 World Cup hi ram 32 in an khel dawn a, heng zinga ram 31 te chuan qualifying an khel a, a thlengtu ram erawh an thlen dawn avangin an qualify nghal thin a ni.

2018 World Cup hi Iceland leh Panama te tan chuan an World Cup vawikhat khelhna tur a ni dawn. Kumin World Cup-ah hian matche 64 a awm dawn a, Russia ram hmun 12-ah khelh a ni ang. World Cup champion hian 2021 Fifa Confederations Cup an qualify leh nghal bawk dawn a ni.

World Cup trophy hmasa ber chu Jules Rimet Cup tih a vuah a ni a, a original name chu “Victory” a ni , Fifa president hlui Jules Rimet-a hming chawiin “Victory” tih chu “Jules Rimet Cup” tia thlak a ni. He Jules Rimet Cup hi French lungker thiam Abel Lafleur-a kutchhuak a ni a, 35 cm a sang, 3.8 kg a rit niin rangkachak leh silver tuia luan chhuah vek a ni. A hnuai lamah lunghlu chikhat rawng pawl hman a ni bawk.

Kum 1930 atanga kum 1970 thleng khan ‘Jules Rimet Trophy’ hi hman a ni a, he trophy hi Uruguay-in an chawi hmasa ber a ni. Tin, World War II hunlai 1938 -ah khan Italy-in an chawi a, Italian Vice President Ottorino Barassi chuan Hitler leh a hoten an laksak loh nan a pheikhawk dahna bawm chhungah a thukru nghe nghe.

England-in World Cup 1966 a thlen dawn khan a bo daih mai a, ni 7 hnuah newspaper-a intuamin Suburban Garden hung chhungah hmuh leh a ni a. Brazil-in World Cup vawi thum a zawna an champion avanga an neih hlen theih tawh hnuin kum 1983 khan Rio de janeiro atangin ruk chhauh a ni leh hlauh mai. Kum 1930-1970 chhungin World Cup vawi kua neih a ni a. Kum 1942 leh 1946-ah World War II avangin khelh theih a ni lova, he Jules Rimet Cup-ah hian ram hming pakua nem kai hman a ni.

World Cup Trophy : Jules Rimet Cup chu Brazil-in vawithum an champion avangin an nei hlen ta a. World Cup 1974-ah Trophy thar tur an neih a ngai ta, mi 53 zetin he World Cup trophy tur hi an thehlut a, Italian artist Silvio Gazzaniga-a trophy ker mawi tak chu Fifa-in thlang tura a ruat ram 7 aiawh ten an thlang ta a ni. He trophy hi 36.5 cm-a sang; rangkachak hlang 18 carat KG 5-a rit niin, kum 2017-a US dollar-a a hlut zawng chu $150,000 a ni.

Jules Rimet Trophy Chawi tawhte:-

Brazil – 1958,1962,1970

Uruguay – 1930,1950

Italy- 1934,1938

West Germany – 1954

England – 1966

FIFA World Cup Trophy:-

West Germany- 1974,1990

Argentina- 1978,1986

Italy- 1982,2006

Brazil – 1994,2002

France – 1998

Spain – 2010

Germany – 2014

Khawvel khawmualpui hrang hrang zingah Europe leh South America chiah World Cup-ah an la champion a. Europe ramin vawii 11 trophy an chawi tawh a, South America ramin vawi 9 an chawi ve tawh thung a ni. Europe leh South America tih loh Khawvel ram hrang hrang zingah World Cup final khel phak an la awm lo bawk a ni.

Tun tum World Cup-ah hian vawi 4 champion tawh Italy chuan qualifying an paltlang zo lo a, World Cup 2018 an khel ve thei dawn lo. Tin, Africa leh South America atanga football thiam awm khawmna lar tak Cameroon, Ivory Coast, Ghana leh Chile te pawh he World Cup khel tur hian an tling zo lo bawk a ni.