2015 Wimbledon chu tan a ni ta a, a tan niah mipa champion lai Novak Djokovic chuan German mi Philipp Kohlschreiber chu 6-4 6-4 6-4 in straight set-in a hneh a, hmeichhe lamah World number one Serena Williams pawhin a khingpui Margarita Gasparyan a hneh bawk.

Top seed Serbian hian Centre court-ah opening match a khel a, a khingpui hi awlsam tein a hneh dawn emaw tih laiin beisei aiin a lo khauh si a. Kum 28 mi Novak Djokovic hian round two-ah Lleyton Hewitt hnehtu Jarkko Nieminen a hmachhawn dawn a ni.

World number 33 Philipp Kohlschreiber chu Djokovic chuan opening match-a hmachhawnah chuan hmachhawn hautak tak a nih thu sawiin, 2012 quarter finalist Philipp Kohlschreiber hian Djokovic tan harsatna a siam teuh thin hle a, French Open final-a Stan Wawrinka an hneh loh hnua competitive match a khelh hmasak berah Novak hian straight-in hnehna a chang ta a ni.

Hmeichhe lamah Serena Williams chuan 6-4 6-1 in debutant Margarita Gasparyan a hneh a, second round a lut. Austarlian Open leh French Open champion lai Serena hi kumin Wimbledon champion tura rinkai ber pakhat a ni mek bawk. Maria Sharapova pawhin 6-2 6-2 in Johanna Konta a hneh bawk a, 2015 Wimbledon hi July ni 12, 2015-a khelh zawh hman tura ruahman a ni.