Wimbledon final-ah Angelique Kerber

13th July 2018, 01:07AM

Angelique Kerber chuan Jelena Ostapenko a hneh a, Wimbledon final a lut.

Vawi hnih ngawt Grand Slam title lo la tawh Angelique Kerber hi Wimbledon semi final-ah 2017 French Open champion Jelena Ostapenko nen an inkhel a, All England Club Centre Court-ah hian Kerber hi 6-3, 6-3 in a chak a ni.

Kerber chuan, “Final ka lut leh thei hi ka lawm tak zet a, final khelh hun ka nghakhlel tawh a, a phurawm ka ti tak tak,” tiin a lawm zia a sawi.

Jelena Ostapenko hian semi final kalkawngah set a hloh miah lo a, mahse Kerber hmaah chuan a che thei meuh lo a, set a la lo ve thung a. An inkhelah hian set hmasaah Kerber chuan unforced error 7 chauh a nei a ni.

Set hnihna an khelh leh pawhin Kerber bawk chu a chungnung leh hle a, Ostapenko chuan unforced error a ngah leh hle a, 35 zet a nei hman a, a tawpah Kerber chu 6-3 in a chak ta a ni.

Kum 21-a upa Jelena Ostapenko hian Wimbledon semi final a khelh hmasak ber tum a ni a, champion tur chuan kum dang nghah thlen leh phawt a ngai dawn a ni.

11th seed Angelique Kerber hian 1996 a Steffi Graf a champion hnuah German tennis player zingah Wimbledon champion ni leh thei hmasa ber nih a tum hle a. 2016 khan Wimbledon final hi a lo thleng tawh a, Serena Williams a hneh lo a ni.

Kumin final-ah hian Serena Williams bawk hi Kerber hian a hmachhawn leh thei dawn a, Serena hian final lut turin Julia Goerges a hneh a ngai dawn a. Kerber-i hnam pui Goerges hian Grand Slam semi final a khelh hmasak ber a ni.

Copyright © inkhel.com 2024. All rights reserved.