Wimbledon 2017 khelh mekah quarter finalist kan hre kim teuh tawh hle, thawhtanni zan khan Murray leh Federer te chuan an khingpui ve ve an hneh a, quarter final an lut a, Nadal erawh Gilles Muller lakah a tlawm hlauh mai.
Rafael Nadal chuan 3-6 4-6 6-3 6-4 13-15 -a Gilles Muller hneh lovin Wimbledon quarter final a thleng ve zo ta lo. Darkar 4 leh minute 47 zet an inkhel, a tawpah French Open 2017-a champion Nadal a chak zo ta lo a ni.
Roger Federer chuan 6-4, 6-2, 6-4 -a Grigor Dimitrov hnehin Wimbledon quarter final a lut. A vawi 50 nan Federer hian Grand Slam quarter final a lut ta a, kum 35 mi niin Open Era-a Wimbledon quarter final lut thei upa ber dawttu a ni.
Kumin hian a champion a nih ngat chuan history a siam dawn a, mipa zinga Wimbledon title vawi 8 la thei hmasa ber a ni dawn a ni. Federer hian 4-6 7-5 4-6 7-5 6-1 a Zverev hnehtu Raonic chu quarter final-ah a hmachhawn dawn a ni.
Andy Murray chuan 7-6 6-4 6-4 a Benoit Paire hnehin Wimbledon quarter final a lut ta e. Murray hian Wimbledon quarter final a zawnin vawi 10 a lut ta a. World Number one hian Wimbledon-ah a vawi 57 chakna ni hmel a hmu ta bawk a ni.
Britain mi zingah Wimbledon-a chak hnem ber a ni ta a, a title humhim turin hmalam a pan mek zel. Murray hian 5-7 7-6 (7-5) 6-3 6-7(11-13) 6-3 a Anderson hnehtu Querrey a hmachhawn dawn a ni.
Hmeichhe lamah Britain Konta chuan 7-6 (7-3) 4-6 6-4 in French Caroline Garcia a hneh a, kum 1984 hnua Britain mi Wimbledon quarter final lut leh hmasa ber a ni.
Hmeichhe quarter final-ah hian Muguruza vs Kuznetsova, V. Williams vs Ostapenko, Rybáriková vs Vandeweghe leh Konta vs Halep kan hmu dawn a ni.