Garbine Muguruza chuan 7-5 6-0 in Venus Williams a hneh a, 2017 Wimbledon hmeichhe champion a ni ta. Garbine Muguruza hi Grand Slam final-a Venus Williams leh Serena Williams te hneh ve ve thei awmchhun a la ni e.

Spanish Garbine Muguruza hian Wimbledon title hmasa ber a la ta a, kum 23 mi hian Centre court-ah straight set-in kum 37 mi Venus Williams hi a hneh a, Venus hian kum 9 hnua title lak leh a tumna chu a tawp ta a, champion ngat selang chuan Open era-a Wimbledon hmeichhe champion upa ber a ni thei dawn a ni.

Nikum khan Garbine Muguruza hian French Open final-ah Serena Williams hnehin Grand Slam title a la a, Wimbledon-ah a chhunzawm ta a ni.

"Match hautak ber vawiin khan ka khel, player ropui tak a ni, ka naupan lai atangin a inkhel hi ka en thin a, amah atangin nasa takin ka inzir a ni.

"Hemi hmuna ka inkhel thei hi a ropui ka ti a, ka zam hle nghe nghe, a chhan chu heta champion hi ka chak ber a ni thin," tiin Garbine Muguruza chuan a sawi.

Set khatnaah an inhnehtawk hle a, hetih lai hian Venus Williams hian tihsual a ngah bik hle, chu chu Garbine Muguruza tan chance tha a ni a, set hnihnaah erawh naupang zawk leh thahrui ngah zawk Garbine Muguruza a dingchang chhunzawm ta zawk a ni.