Arsenal German defender Skhrodan Mustafi chuan Arsenal a zawm chu Arsene Wenger vang a nih thu a sawi. Mustafi hian season tan tirh khan Valencia atangin Arsenal a zawm a, Gunners defender man to ber niin Wenger-a'n £35million zetin a lalut a ni.

"Coach tha hre tur chuan a bula nitin kan training a ngai thin. Arsene hi Arsenal ka pan chhan pawimawh tak a ni a, a chhan chu kum 20 chhung a chenchilh tawhna club a nihna hian awmze nei takin kalphung a nei tih a lantir a ni," tiin Wenger chu a tana a pawimawh thu a sawi.

Arsenal hian Mustafi an lalut hi an tifuh hle kan ti thei awm e.

Season danga defence phui hleithei lo kha Mustafi awm hnuah chuan an ziaawm hle a, Laurent Koscielny tan pawh a khelhpui tur tak niin a lang. Arsenal player zingah Koscielny hian ball kang a chang hnem ber a, Mustafi hian a dawt a ni.

German defender hian Arsenal kawr ha chungin tlawm a la nei lo a, kum 10 chuang Premier League champion ni tawh lo Arsenal tan champion an tumna kawngah player pawimawh a nih ngei a rinawm.