Tottenham lakah si khat faia an tlawm tum khan French striker Alexandre Lacazette chuan a khup a ti hliam palh hlauh mai. Zai a ngai dawn a, kar 5 emaw vel chhung a chawlh a ngai dawn nia tarlan a ni.

Nikum nipui bazarah khan Wenger chuan £52m in Lacazette hi a lei a, season bul a tan fuh hle, hetih lai hian a hnulamah erawh a chetha ta lem lo. Premier League game hnuhnung 11 atangin goal khat chiah a khung bawk.

A inhliam dan chungchangah Wenger chuan, "A khup kha kan beisei aia nasain a vung a, zai nghal a ngai dawn a ni. Kar li atanga kar nga vel a chawlh a ngaih dawn hmel.

"Kan tan chuan a pawi tak zet a ni, chutih laiin harsatna sutkian dan erawh kan zawn a ngai. Tuman khatianga a inhliam tur kha an sawi lawk thei lo, football-ah hi chuan hei hi thil nihdan phung ve reng a ni a, midang tan khelhna hun tha a inhawng tihna a ni e," tiin a sawi.

Arsenal hian Europa League leh League Cup-ah Lacazette hi an chhawr thei dawn lo chiang a, Aubameyang pawh Cup-tied avangin Europa League-ah a inlan thei dawn lo bawk.

"Lacazette chu kan chhawr thei dawn lo, ka rin dan chuan a hma pawh khan a khup kha na a lo ti tawh a ni maithei, ka hre lo. Kha kha goal a khung tam theih lohna chhan a nih a rinawm, a chhan chu goal khung thang a ni si a," tiin Wenger chuan Lacazette-a goal khung theih loh chhan nia a ngaihdan a sawichhuak.