Golden State Warriors chuan kum 4 chhungin NBA title 3 an la teuh ta hle a, Cleveland Cavaliers chu 110-102 in an hneh a, NBA Finals-ah 3-0 in hma an hruai a, title la tur hian vawi khat chak chiah an mamawh ta.

Kevin Durant chuan point 43 a thun a, rebound 13 lain assist 7 a nei bawk a, playoff-ah chuan a la thun hnem ber a ni nghe nghe a. Game 2-a NBA record siamtu Stephen Curry chu a che thei meuh lo a, point 11 chauh a thun.

Cavaliers thiampuipa LeBron James chuan point 33 a thun a, rebound 10 lain assist 11 a nei bawk a, mahse a team te chu a chakpui zo ta lo a. Kevin Love pawhin Cavaliers tan point 20 a thun a ni.

First half chhungin Cleveland chuan 16-4 in hma an hruai hman a, half time a thlen chuan point 6 in hma an la hruai zel a. 3rd quarter an khel chho a, Warriors chu an rawn chungnung tan a, hemi quarter bikah hian Warriors chuan 31-23 in hma an hruai a, 4th quarter an khelh tanin 83-81 in Golden State hian hma an hruai a ni.

4th quarter-ah hian chak zawk tur rin thiam harsa khawpin an inhnehtawk chho a. Durant zarah Warriors hi an chak ta hram a. Second 49.8 a la awm tihin Durant chuan 3-pointer a thun a, an chak a nem nghet a. Nikumah pawh champion lai Golden State hian Cavaliers lakah 3-0 in hma an hruai a, Game 4-ah an chak lo a, Game 5-ah chakin NBA title an la a. Kuminah chuan Game 4-ah an champion lo ang tih a sawi theih ta lo.