Warriors in NBA Finals-ah hma an hruai

01st June 2018, 10:06PM

Zirtawpni zingah NBA Finals Game 1 an khel a, Golden State Warriors chuan 124-114 in Cleveland Cavaliers an hneh a, 1-0 in hma an hruai.

Oracle Arena, Oakland-a inkhelah hian Stephen Curry chuan champion lai Warriors tan point 29 a thun a, a zawnin kum li chu Warriors hian Cavaliers hi NBA Finals game hmasa berah an hneh ta a ni.

Cavaliers chuan a tir lamah hma an hruai a, mahse half time a thlen chuan 56-56 niin, chak zawk tur sawi theih a ni lo a. Third quarter-a hlauhawm em em thin Warriors chu Cavaliers hian an chelh thei zel a, an inthlauhna pawh point 6 chauh niin, fourth quarter-ah an innihrual leh bawk a.

Referee te chuan hun tawp dawnah tihsual an nei a, free-throw line-ah LeBron James ni loin Kevin Durant zawk an kaltir tlat. Hetiang game pawimawha thutlukna siam atan chuan a fuh lo bawk a, Cleveland coach Tyronn Lue chu a thinrim hle a. Cleveland hian chak theihna hun remchang an nei a, mahse JR Smith chu a che fuh lo a, hma an hruai emaw a ti a ni maithei a, point score tum loin anmahni lamah ball a tlanpui daih mai a ni. A hnuah an team chuan timeout koh an tum nia hriain, a nghak tiin a insawifiah.

Hun a tawp a, 107-107 in an la inhnehtawk chiah si a, overtime khelh a ngai a. OT an khelh hian Warriors an che tha hle a, point 17 ngawt mai an thun a, Cavaliers chuan point 7 chiah an tun belh a, an khingpuite hi an um pha ta lo a, Warriors chuan 1-0 in hma an hruai ta a ni.

Warriors tan Curry chuan a thun hnem ber a, point 29 a thun bakah hian rebound 6 a la bawk a. Kevin Durant chuan point 26 a thun bawk a, anni pahnih hian assist 15 an nei dun a. Klay Thompson chuan point 24 a thun bawk.

Golden State tan hian 2015 NBA Finals MVP Andre Iguodala chu a la khel thei lo a. A khup veilam a tihnat avangin a zawnin postseason game 5 chu a khel ta lo.

Cavaliers tan LeBron James chuan point 51 ngawt mai a thun a, a zawna NBA Finals vawi 8 khel mek James hian 1993 a Michael Jordan record siam, point 55 a pha teuh hle a, score sang ber dawttu a ni.

Playoff game-ah point 40 chin chunglam vawi 8 a thun tling ta a, 1965-a Hall of Famer Jerry West-a record siam, postseason chhunga point 40 chin thun hnem chu a nihrual ta chiah a. Playoff-ah point 30 chin hi vawi 109 a thun tling ta bawk a, point 30 chin thun tling hnem ber Michael Jordan a nihrual ta chiah bawk.

Kevin Love pawhin Cavaliers tan hian point 21 a thun a, rebound 13 a la bawk a, mahse an teammate dangte chuan boruak an nei sang lo hle a, an tan a pawi ta a ni.

Game 2 pawh hi Oracle Arena-ah tho an khel dawn a, hemi hmunah hian Warriors chu postseason game hnuhnung 19 an khelhah vawi 18 an chak tawh a. 2015 khan Golden State hian Cleveland hi hnehin kum 40 chhunga a vawi khatna atan title an la a, hemi kum hian game hmasa pahnih chu OT khelh ngai niin, Golden State chuan Game 1 an la a, Game 2 chu Cleveland in an la ve thung.

Copyright © inkhel.com 2024. All rights reserved.