All-Star forward Kevin Durant chuan Golden State Warriors chhuahsan a la tum loh thu sawiin, kumin nipui chhungin contract thar ziah a tum thu a sawi.

Kevin Durant hian Warriors ah kum hnih chhung atan $51 million contract a ziak a, a kum khatna a hmang zo dawn chiah a. He contract a ziahah hian 2018-19 season ah chuan a duh chuan chhuak thei turin thu an dah a. Mahse, Durant chuan hmun dang pan loin a khelhna pangngaia la awm chhunzawm hi a thlang a ni.

“Warriors chhuahsan ka la tum lo a, helaia la awm zel hi ka rilruk a. Nakin zela awm dan tur chu kan la ngaihtuah tha leh ang chu,” a ti.

April thla khan Durant hian contract thar ziak loin free agent nih a thlang dawn tiin thu a thang a. Nikumah khan a hlawh tur pangngai aia $10 million vela tlem a lalut a, hetianga a hlawh tihhniam a remtih zarah an team chuan forward Andre Iguodala leh point guard Shaun Livingston te an chelh zui theih phah a ni.

Durant hi NBA Finals Game 3 ah a che tha hle a point 43 a score bakah rebound 13 lain assist 7 a nei a. Feet 30 chuang atangin 3-point vawi 4 ngawt a score nghe nghe a ni.

An sawi dan chuan Kevin Durant hian kum 4 daih tur contract thar ziah a duh a, hetiang contract a ziak thar a nih chuan a hlawh tur pawh $158 million vel bawr a ni thei dawn a ni.