14 Nov 2017 02:34

inkhel

Vietnam lamah Giggs

Manchester United winger hlui Ryan Giggs chuan Vietnamese football academy-a thuneitu ber ni turin hna thar a nei dawn.

Promotion Fund of Vietnamese Football Talents FC (PVF) tarlan danin kum 43 mi Giggs hian player-te bakah coach-ho training a pe dawn a, kum hnih chhung inremna hi an ziak dawn a kum khatah vawikhat Vietnam hi a thlawh ang.

Premier League nomawi vawi 13 chawi tawh hian October thla khan Leicester City leh Everton enkawl a hreh lo tih a sawi a, amaherawhchu Leicester hian an manager thar ni turin Claude Puel an ruai tawh a, Everton hian manager thar tur an melh ve mek bawk.

Manchester United-in kum 2014-a David Moyes an ban khan Giggs hian manager hna a chelh lailawk a, Luis van Gaal hnuaiah Manchester United-ah assistant manager ni lehin kum 2016 May thla khan Dutch manager hi an ban a Giggs hi a chhuak ve nghal bawk.

Wales winger hlui Giggs hian karlehah Vietnam hi a thlawh dawn a, lawmluhna hun neih a ni ang.

Lawmluhna hunah hian Manchester United-a a khelhpui țhin Paul Scholes chu khuallian a ni dawn a, Promotion Fund of Vietnamese Football Talents FC (PVF) chuan Giggs an rawih chhan hi an rama youth football training centre lian ber nih an duh vang niin an sawi a ni.