Video game-a Football game hmasa ho kha

26th September 2016, 09:09PM

VCR a rawn chhuak a, a ropui kan ti hle, chutah 8 bit video game a rawn chhuak chiah kha chu khawvel tharah kan lut chiang kher mai. Kan generation ho kha Color TV en hmasa ber, VCR en hmasa ber leh video game khel hmasa berte kan ni a. Generation vannei tak kan ni chiang mai.

Tunlai khawvelah FIFA 14, 15 leh 16 te a rawn chhuak chho zel a, kum tin hian danglamna thar a awm ve chho zeuh zeuh zel a, a game play erawh danglamna a tam em em ngai lo. Gamer-ten chutiang vakin FIFA 17 thar tur pawh hi hahipin an sawi kher lovang. Keini kha chu video game khel ngai reng reng lo khan kan han khel chho thut kha a ni a, a danglam zia leh a nawm zia kha tunlai game thar ho hian khatianga nawmna tak tak kha min pe leh tawh ngai lo ti ila ka sawi sual lovang.

8 bit console-ah khan Nintendo Entertainment System kha a nawlpui khelh a ni a. Atari khel hman kha awm nawk mahse Nintendo khan ro a rel chhunzawm a nih kha. 64 in 1 catridge mawlh mai kha, vawiin thlengin a indawt dan nen lam ka la hre vek. Mario Bros kha a nuam hle a, khelh nasat ber pawh a ni. Vawi khat chu Aizawl Damdawi in pheiah hian 99999999 in 1 kha an lo zuar a.

Keini video game nei thar kha chuan catridge-ah engtiangin nge game tha leh tha lo a awm thin tih kan hre ve si lo. Rs. 350 in kan lei a, kan lawm kher mai. Turtles te kha a awm nawk a, phur takin inah kan hawng a. Mahse kan han khel chiah mai chu leh, Mario tui lut te, mario thlawk chi te leh game ngai ho deuh deuh hlir kha a lo ni a, a pawi teh asin.

Football ngaina kan ni a, Football game awm thei ang zawng zawng kha chu kan khel kim niin ka hria. NES Football game zingah Konami Hyper Soccer te, Goal 2 te, Nintendo World Cup te, J League Winning Goal te leh Tecmo World Cup te kha a nuam thin hle. Winning Goal kha chu a nuam a nih kha. Tin, Tecmo World Cup kha kan khelh hnem pawl a ni a, Goal 3 mawlh mai kha, a hit cher cher khawp mai. Kan han pet sangha a, tuiah te kan tang, a chang leh thliin min len bawk, kan ball te kha a kang/alh vel thul, a hlimawm thin kher mai.

Computer-ah khan FIFA 98 kha kan khel nasa bawk. Tin, PlayStation rawn chhuah hnua Football game pawh khelh a nuam hle, mahse ka football game khelh tawh zingah chuan 16bit Sega Genesis game International Super Star Soccer Deluxe kha nuam ka la ti ber. A tak a ang si, a gameplay pawh kha a nuam em em a. Carboni te an la tha chur chur hle. Box chhung thleng kan khalh a, box sir atangin ka'n han thuai goal ta mai thin kha a ni a. Mak em em thin chu halfway line atang te khan Carboni khan a tukhum zawngin a tauh goal thei vel, mak hi kan ti thei lutuk a ni.

Bike mawi tak tak kum tin rawn chhuak thin mahse CBZ rawn chhuah tum ang tluka mawi tih ka la nei leh lo. CBZ aia bike mawi tak tak rawn chhuak teuh tawh mahse CBZ rawn chhuah tum kha chuan a hmain bike mawi tak tia sawi tur Mizoramah a la awm lo, a rawn dang haih a nih kha. Khatiang deuh chiah khan tun hnuah game ropui tak tak, graphics mawi tak tak leh khelh nuam tak tak rawn chhuak teuh tawh mahse video game kan hmelhriat hmasak ber tuma kan game khelhte aia nuam kha a awm leh hleithei tawh lo a nih hi. Virtual Reality game a rawn chhuak chho nawk dawn a, hei erawh thil thar a ni leh dawn, khawvel tharah kan lut leh dawn niin a lang a, a phurawm khawp mai.

Copyright © inkhel.com 2024. All rights reserved.