Khawvelin nghakhlel taka a thlir mek Conor McGregor leh Floyd Mayweather inhnek tur chuan boruak a nei lian chho zel a, inbuatsaihna pawhin a vawrtawp a thleng chho mek zel.

MMA fighter McGregor leh Boxing khawvela hnehloh la tawng lo Mayweather-te hian an inhnekna tur hmun Las Vegas an thleng ve ve tawh a, August ni 26 hian T-Mobile Arena-ah an innuai dawn.

An inhnekna tur T-Mobile Arena-ah hian mipui 20,000 an leng a, BBC chuan ticket hralhloh 7,000 ala awm tih an tarlang.

Ticket hralhloh ala awm nual nachhan ni a lang chu ticket man hi a to em vang niin a ngaih theih a, ticket man tlawm ber hi $500 niin India pawisa chuan Rs. 32,067 a ni a, a to ber pheichu $107,000 a ni a hei hi India pawisaa chantir chuan Rs. 6,861,786 a ni hem mai!

Las Vegas an thlenin Mayweather hian mipui hmachhawn lo thei ang berin hun a hmang a, fans țhenkhat lungawi lo in an 'boo' hial bawk.

UFC champion McGregor erawh mipuiin an lawm hle a, Irish flag nen lo hmuakin a theih ang ang a tam a chibai bakah a 'high-five' bawk.

Kum 29 McGregor chuan, "Mayweather hian mut tir a mamawh a, tichuan mi țha zawk niin alo harhchhuak ang. Hetiang hian alakah ka ti dawn a ni " tiin a sawi.

T-Mobile Arena-a inhnek turah hian zaithiam lar Demi Lovato chuan United States hnam hla 'The Star-Spangled Banner' a sa dawn a, 'Sorry, Not Sorry' hmanga khawvel tuam mektu hi UFC leh Boxing ngaina tak a ni.

Inrinnia inhnek turah hian khawvel hmun hrang hranga thuthar lakhawmtu sangkhat vel chu a hmuna tel phalsak an ni a, McGregor leh Mayweather inhnek tur hian $600m vel an hmuhchhuah a beiseiawm a Boxing khawvela sum tamna ber anih ngei a rinawm bawk a ni.