Inrinni zan khan Santiago Bernabeu-ah si li faiin Real Madrid chuan Barcelona an hneh lo a nih kha. Kha match khelh zawhah khan Ronaldo leh Real Madrid boss Rafa Benitez inkar chungchang chuan media a luah nghal a.
Hetiang chanchin hrang hrang leng vel karah Manchester United boss Van Gaal chuan Old Trafford-a Cristiano Ronaldo lakkir leh a tum thu a lo sawi ve khauh bawk nen. Ronaldo leh Manchester United sawi zawm a ni chho leh a ni.
Heng boruak ri vel karah Ronaldo-a agent Jorge Mendes a rawn tawng chhuak ta. Jorge Mendes chuan," Ronaldo hian Real Madrid-ah a football zinkawng a khar ang," tiin a sawi. He thu hian vawiin sports chanchinthar a luah nileng a, Manchester United chuan Old Trafford-ah thawnthu ngaihnawm tak siama Ronaldo lakkir leh an tumna chu a tlawlh ta a ni kan ti thei awm e.
Real Madrid-a Ronaldo cham leh cham loh chungchang chu a contract bakah Madrid-a a hlim leh hlim lovah a innghat a. Tunah hian kum thum daih Bernabeu-ah contract a la nei. Ronaldo hian football level sang tak a khelh peih tawh loh hunah United States lamah kal a tum deuh niin Mirror chuan a tarlang nghe nghe.
Rafa Benitez-a'n Real Madrid a enkawl tirh khan Ronaldo chuan,"A hnuaiah hian eng trophy mah kan la lovang," tiin an president Perez-a hnenah a sawi niin media te chuan an tarlang a nih kha. Rafa khan Welsh forward Gareth Bale chu a la naupang zawk avangin Real Madrid innghahna ni tura chher a tum niin a sawi a, hmun lailum pek a tum a nih kha. Khangte avang khan Ronaldo hi Real Madrid-ah a hlim tawh lo nitein an sawi.
El Clasico-a 4-0 laia an tlawm tuk tukleh thawhtanni khan Perez chuan Press conference a nei a, an coach chunga rinna an nghah thu a sawi a nih kha. Mahse Perez hian tun dinhmunah chuan an rin tawk laiin nakin hun erawh a sawi theih loh thu a sawi tel bawk. Real Madrid hotute hian Ronaldo hi an support tha hle a, Rafa chungchangah Ronaldo a buai lo nia report a ni bawk a. Hengte a nih avangin Ronaldo chuan Real Madrid-a a contract hi a hmang zo ngei dawn niin a lang a ni.