Tun season a zo anga, summer transfer chanchin ngaihnawm tak tak a awm leh dawn chiang e. Manchester United chuan veteran midfielder Michael Carrick thlak nan Real Madrid midfielder Toni Kroos lak an tum dawn niin Independent chuan a tarlang.

Paul Pogba chu Real Madrid hian an awt nia thuthang a awm mek laiin Mourinho chuan Pogba thlakna tur lam a melh lo niin a lang. Zirtawpnia press conference a neihnaah Mourinho chuan midfielder tha lak an tum thu a sawi chiang.

Tun season zawh rualin Carrick hian chawlh zai a rel ve tawh dawn niin a lang a, Mourinho chuan Matic, Pogba leh Toni Kroos te chu remkhawm a tum hle niin Independent chuan a tarlang a ni.

Kum 2014 khan Manchester United chuan German International hi lak an lo tum tawh a, an la hman teuh hle nghe nghe a nih kha, mahse Madrid lam a pan ta zawk a. Tun nipui bazarah hian Real Madrid chuan an player thenkhat hralh nual an tum nia report a ni a, chumi hnuah player man to tha tak tak lakkhawm an tum bawk a ni awm e.

Mourinho chuan Dortmund midfielder Julian Weigl pawh Kross-a kiangah khelh tir a duh dawn nia sawi a ni a, Kroos hi kum 28 mi a ni ve tawh a, kum 5 chhung emaw vel chu tha taka a la khelh theih dawn avangin United hian to tak pawhin an ngam a rinawm.

"Media te chuan striker emaw winger emaw lei kan tum niin in ngai ang. Ka sawi loh puite pawh min sawitir chang a awm ang, tuna ka sawi chian chu Carrick hi kan chhawr rei thei tawh dawn lo, chuvang chuan midfielder tha tak kan lei dawn a ni," tiin United boss Jose Mourinho chuan a sawi.