13 Sep 2017 02:56

Inkhel

Mizo Sports Website hmasa ber

​United-in si thum faiin FC Basel an hneh

Old Trafford-ah Manchester United chuan FC Basel an mikhual, mual neitu United hian Fellaini, Lukaku leh Rashford te hmangin si thum faiin hnehna an chang.

Jose Mourinho chuan Pogba chu captain-ah hmang mahse inhliam avangin minute 17 na lekah lakchhuah a ni a, bench atanga lut Fellaini chuan goal khung nghalin, Lukaku chuan United-a a Champions League goal hmasa ber a khung bakah Champions League-a a vawi khat khelhnaah Rashford chuan goal a khung bawk.

Manchester United 3-0 FC Basel

(Fellaini 35', Lukaku 53', Rashford 84'

Man Utd XI : De Gea; Young, Smalling, Lindelof, Blind; Matic, Pogba; Mata, Mkhitaryan, Martial; Lukaku.

Basel XI: Vaclík; Akanji, Suchý, Balanta; Lang, T. Xhaka, Zuffi, Riveros; Steffen, van Wolfswinkel, Elyounoussi.

First half-ah Mkhitaryan chuan chance vawi hnih a hlah, minute 15 an khelh tlin hma hretin box dinglam atanga Mata cross tha zet chu Mkhitaryan chuan a tauh over. Dinglam atanga Lukaku cross tha zet pawh Mkhitaryan hian 6 yard box atangin a shot, Basel goal post a per.

Minute 17 na lekah United captain Pogba chuan a hamstring a ti hliam palh hlauh, Mourinho chuan Fellaini a dahlut a, ani hian United goal khatna a khung. 35 mins-ah mual dinglam sir atanga Young cross tha zet chu box chhung atangin Fellaini chuan a tauh goal. Half time a nih chuan si khat faiin United chuan hma an hruai.

Second half tan a ni a, United chuan an nawr chhunzawm nghal, 53 mins-ah United chuan corner hlawhchhuakin, short corner an neih hnuah Blind chuan a cross, box chhunga lo awm Lukaku chuan a tauh goal ta. Lukaku hian United tan game 6 khel tawhin goal 6 a khung a, United tan Champions League-a a goal hmasa ber a khung ta bawk a ni.

Hemi hnu hian Lukaku chuan goal hnih khungna chance tha zet a nei chhunzawm. Mkhitaryan free kick chu Lukaku hian far post-ah tauhin, FC Basel goalkeeper Vaclík chuan a lo dan sak a. Basel pawhin goal khung tumin nawr mahse chance hlauhawm tak tak an nei thei lo, 64 mins-ah Elyounoussi shot tha zet chu De Gea chuan ropui takin a lo dang, hei bak chu chance tha an nei tawh lo.

Hun tawp dawn minute 6 a la awm tihin bench atanga lut Rashford chuan Champions League-a a debut game-ah goal a khung ta, box dinglam sir atanga Fellaini cross chu penalty spot vel atangin kawh zetin top corner-ah a chhuih lut, Rashford hian Premier League, League Cup, Europa League, England Under 21, England senior team leh Champions League-a a debut match-ah goal a khung ta vek a ni.

Goal dang a lut tawh lo, Manchester United chuan si thum faiin hnehna an chang ta a ni. Group A match dangah CSKA Moscow chuan 2-1 in Benfica an hneh a, United chu group hmahruaitu niin Basel chu group mawngphah an ni nghal a ni.

Pictures credit : Getty