11 Jan 2017 10:43

Inkhel

Mizo Sports Website hmasa ber

​United chuan Wembley an hnaih zel

Trafford-ah Man Utd chuan EFL Cup Semi final 1st leg-ah Hull City an mikhual a, Mata leh Fellaini-te goal hmangin Manchester United chuan an mikhual Hull City hi si hnih faiin an hneh a, January ni 26-ah Hull City home-ah 2nd leg khelh a ni leh ang.

Dinhmun tha takah Man Utd an ding chho mek a, 2nd leg-ah pawh thil mak a thleng a nih ngawt loh chuan United hi final lut tura rinkai an ni. Competition hrang hrangah Jose Mourinho chuan a zawnin vawi 9 ngawt United a chakpui ta a ni.

United tana goal hmasa khungtu Juan Mata chuan Chelsea tan game 135 atangin goal 33 a khung thei kha a ni a, Manchester United tan erawh game 129 atangin goal 33 a khung tling der tawh a ni. Chhuak mai tur nia rin Fellaini chuan goal pawimawh; goal hnihna a khung a, a goal khung zawhah Mourinho nen an inkuah nasa hle, Fellaini hian United a chhuahsan a rinawm loh ta hle a ni.

Manchester United 2-0 Hull City

(Mata 56' Fellaini 87')

PLAYER RATINGS (data source : opta)

Manchester United: De Gea 6, Valencia 7, Jones 6, Smalling 6, Darmian 8, Herrera 7, Pogba 7, Mata 8, Rooney 6, Mkhitaryan 6, Rashford 6... Subs: Fellaini 7, Lingard 6, Martial 6

Hull: Jakupovic 7, Robertson 7, Maguire 8, Meyler 6, Huddlestone 6, Snodgrass 7, Clucas 6, Diomande 6, Henriksen 6, Mason 6, Tymon 6... Subs: Hernandez 5, Maloney 6, Weir N/A

He match-a goal hnihte hi second half-a lut ve ve an ni a, 56 mins-ah mual dinglam sir atanga Valencia cross chu Mkhitaryan chuan tauhin, he ball hi Mata chuan hnai set sawt atangin a pet goal. TV replay atanga a lan dan chuan Mata goal hi offside niin a lang.

Goal hnihna hi bench atanga lut Fellaini khung a ni a, 87 mins-ah Darmian cross tha zet chu far post-ah chance a awm tawh lo nia a lan hnuah Fellaini chuan a tauh a, Hull City goalkeeper Jakupovic a tauh khum mawi hle, si hnih faiin Man Utd chuan hnehna an chang ta a ni.

He match-ah hian Jakupovic chuan Mata shot tha zet a dang a, Pogba shot pawh a dang bawk. Tin, Pogba chuan free kick atangin goal a khung teuh hle a, Hull City goal post a pet per a ni. Rooney chuan United tana goal khung tam ber record a siam teuh hle a, Pogba ball vawrh tha zet chu umin a pet goal teuh hle nghe nghe a ni.

Pathianni zanah Manchester chuan Liverpool an mikhual dawn, Old Trafford-ah Jose Mourinho chuan chak ngei a tum ruh hle, Zlatan Ibrahimovic leh Carrick te a dah awl a, Rooney pawh second half-ah a la chhuak nghe nghe a ni. United hian FA Cup fourth round an lut a, EFL Cup semi final-ah dinhmun tha zawkah an ding mek. Europa League-ah pawh knock out stage an lut bawk a. Premier League-ah beiseina la nei hram hramin hma lam an pan chho mek bawk a ni.

Pictures credit : Reuters & Getty