21 Apr 2017 03:18

Inkhel

Mizo Sports Website hmasa ber

​United chuan Anderlecht hnehin Europa League semi final an lut

First leg-ah 1-1 in an inhnehtawk a, 2nd leg Old Trafford-ah pawh hun pangngaiah 1-1 bawkin an inhnehtawk leh. Extra time khelh a ni a, Rashford chuan extra time-ah goal khungin, 2-1 in Anderlecht lakah United chuan hnehna an chang a, aggregate chuan 3-2 a ni ta a, Ajax, Lyon, Celta Vigo leh Manchester United te chuan Europa League semi final an lut ta a ni.

Tan atanga minute 10-na lekah first leg-a goal khungtu Mkhitaryan chuan United hma hruaipui mahse darkar chanve an khel tling vel tihin Hanni chuan Anderlecht siphurh a rul. Hun pangngaiah goal dang a lut tawh lo, extra time khelh a ni a, 107 mins-ah Rashford chuan Fellaini tauh per chu cool takin a pet goal a, 2-1 in hnehna an chang a, United chuan Europa League semi final an lut ta a ni.

Manchester United 2-1 Anderlecht (AET)

(Mkhitaryan 10', Rashford 107') (Hanni 32')

(3-2 agg)

Manchester United XI : Romero, Valencia, Bailly, Rojo, Shaw, Pogba, Carrick, Lingard, Mkhitaryan, Rashford, Ibrahimovic.

Anderlecht XI: Ruben Martinez, Appiah, Mbodji, Spajic, Obradovic, Chipciu, Tielemans, Dendoncker, Hanni, Acheampong, Teodorczyk.

Inkhelh tir atanga a tawp thlengin Man Utd hi an chungnung zawk a. Goal hmasa ber hi box veilam sir atanga Rashford siam Mkhitaryan pet goal a ni. He goal a luh hnu lawk hian Pogba leh Lingard te chuan chance an nei zui a, Anderlecht goalkeeper Ruben chuan a lo dang ve ve a.

32 mins-ah Anderlecht chuan Hanni hmangin an siphurh an rul, Valencia ball dan per chuan United goal bar a per hnuah Hanni chuan box chhung atangin goal a khung a, 1-1 a ni. Second half-ah United chuan goal khungna chance tha tak tak an nei nual. Shaw cross tha zet chu hnai set sawt atangin Lingard chuan a tlawh goal lo.

Rashford pawhin defender tihsual avangin free ball a um a, goalkeeper a bum vek hnuah goal-ah a chantir thei lo. Zlatan chuan chance tha zet vawi hnih a thelh bawk a, extra time-ah Rashford cross chu Pogba chuan a volley goal teuh hle bawk.

107 mins a ni a, Shaw ball vawrh tha zet chu box chhunga lo awm Fellaini chuan tauh thlain, hei hi Rashford chuan a thai kual hnuah a ke veilamin a pet goal, 2-1 in United chuan hnehna an chang ta a ni.

United an khel tha a, goal erawh an khung hleithei lo, hun pangngai a zawh rualin Zlatan chu inhliam vangin lakchhuah a ni. He match-ah hian Rashford a che ropui hle a, a tlanchakin tharum a ngah a, Chelsea laka goal pawimawh a khung hnuah Manchester United chu Europa League semi final a luhpui ta bawk a ni.