​Union Sports Minister-in MFA Ground, Sairang-ah Football Academy din a tiam

27th June 2017, 05:06AM

Union Minister of State for Youth Affairs and Sports Pu Vijay Goel chuan vawiin (June 26) khan Mizoram a rawn tlawh a, Sairang Dinthara Mizoram Football Association khelmual tlawhin MFA hlawhtlinnate lawmpuina atan football academy din a tiam.

Pu Goel chuan, "Mizorama ka lo kal chhan leh he hmun ka tlawh chhan chu India rama a ber in nih vang a ni," tiin MFA a fak.

MFA Honorary Secretary Pu Lalnghinglova Hmar chuan tun hnaia football-a Mizoram football hmasawnnate a sawi a, "Tun hnai kum li chhung hian India rama football inelna hrang hrangah pakhatna kan ni deuh vek a, kum 2017 phei chu kum tha a ni," a ti.

MFA Honorary Secretary chuan kum 2014-a Santosh Trophy, 2015-a National Games, 2017-a I League-a Aizawl FC champion-te leh Grassroots leh age group inelna hrang hranga Mizoram-in India rama ber a nihnate a sawi.

Hei bakah hian India national team-a kum bithliah hrang hranga Mizoram atanga player kan thawh that dante a sawi bawk.

Mizoram sorkarin football khelhna tur hmunhma tha a buatsaih sak avângin Mizoramin football-a result tha tak a neih theih thu MFA Honorary Secy chuan a sawi a; Pu Goel chuan Mizoram sorkarin sports lama hma a lakna chu fakawm a tih thu a sawi.

Pu Goel chuan, "He hmunah hian academy kan din ang. Vawi leh khatah pawisa kan pe nghal vek thei lo mai thei a, a tahtawlin sum kan pe ang che u. Mizoram Football hma a sawn zel theihna tur leh, chumi piah lama India ramin hma a sawn zel theihna turin football academy tha tak din kan tum ang. Ministry lama ka thawhpuite pawh ka lo hrilh nghal ang, "tiin a sawi.

Pu Vijay Goel chuan, India ramah cricket chauh ni loin football pawhin hma a sawn tih a sawi a, a kalna apiangah football an buaipui nasat thu a sawi rualin football-a Mizoram hmasawnna chu lawmawm a tih thu a sawi.

MFA Ground ah hian MFA President Pu Lal Thanzara chuan Union Minister hi lo dawngsawngin thilpek a hlan bawk a ni.

Sairang Dinthara MFA khelmualah hian Union Sports Minister Pu Vijay Goel bakah Pu Zodintluanga, Sports Minister, Pu Hmingdailova Khiangte, Parliamentary Secretary bakah Sports & Youth Services Department hotute, Mizoram State Sports Council hotute an tel a ni.

Union Minister of State for Sports hian Sihhmuia Suaka Cricket Ground a tlawh bawk a, SAI hmunpui a tlawh bawk a, naktuk (June 27) hian Lammualah XI Million Football Festival a hmanpui ang. 

Copyright © inkhel.com 2024. All rights reserved.