​Umpire a vuak per vanga chak lo Denis Shapovalov

07th February 2017, 05:02PM

Davis Cup khelh mekah Canadian player Denis Shapovalov chuan ball-a umpire Arnaud Gabas a vuakper avangin chak lo a puan nghal a ni. Kum 17 leka upa Shapovalov hian a chet dan avangin a zak hle tih a sawi.

Shapolav hi chak lo a puan (chhuahtir) a nih avang hian $2,000 chawitir a ni a, infiammi nichunga mawi lo taka a chet avangin $5,000 chawi tir a ni bawk. Shapovalov hian a tum reng vanga umpire hi vuakper a nih loh avangin a hremna hi a nep phah a, International Tennis Federation chuan hremna dang lekkawh a tum loh thu a puang tawh a ni.

Umpire Arnaud Gabas

He inkhelah hian Shapovalov leh Great Britain aiawha inlan Kyle Edmund an inhmachhawn a, Edmund hian 6-3 6-4 2-1 in hma a hruai mek nghe nghe. Shapovalov hian set thumnaah a service a hloh a, a thinrim insum hman lo chuan ball a vuakna lamah umpire Gabas-a mitah a vuakper hlauh a ni. Shapovalov a chak loh zui avangin Davis Cup atangin Canada an tlak phah nghe nghe.

Gabas hi venthawn thilah damdawi in panpui nghal a ni a, nimahsela ball hian a mit a tichhe lo hlauh a ni. Shapovalov chuan, "Ka inchhir ngawih ngawih a, ka ram leh ka teammate-te ka tihthlawn avangin ka inthiam lo takzet a ni. Hetiang thil hi vawikhatmah ka ti leh tawh lo ang tih ka sawi duh a, he thil thleng atangin ka inzir dawn a ni," tiin a chet dan avanga a inchhir thu a sawi.

Copyright © inkhel.com 2024. All rights reserved.