Conor Anthony McGregor-a hi July ni 14, 1988 khan a piang a, UFC featherweight leh lightweight champion hlui a ni bawk. Mixed Martial Arts fighter ni mahse; MMA a luhchilh tak tak hma hian boxing a khel thin a, hetah hian welterweight leh light middleweight-ah a khel thin a ni. UFC ranking thar berah pound for pound(mahni tiat puia fighter tha) zingah top 3 dinhmun a hauh mek bawk.

Pian leh murna

Conor Anthony McGregor-a hi Mr. Tony McGregor leh Ms. Margaret McGregor te inkarah ni 14 July, 1988 khan Crumlin, Dublin-ah a lo piang a ni. Amah hi Ireland, Crumlin-ah a seilian chho a, Gaelscoil-ah primary school a kal thin a, secondary school erawh Tallagt-ah a kal thung a, hetah hian football khelh lamah tuina a nei chho hle. A naupan zual deuh lai hian footballer nih a tum thin hle a, Ireland football club pakhat Lourdes Celtic Football Club tan a khel thin nghe nghe a ni.

Boxing Career

Kum 12 anih atangin boxing a khel chho a, footballer nih tum thin kha boxing lama khelh chhoh chakna a nei chho ta zawk a, hetih hunlaia boxing a zir thin lai hian Olympian Phil Sutcliffe-a hnuiah training a la thin nghe nghe a ni. Heta tang tho hian Dean Bryne leh Jamie Kavanagh te atangin boxing tactic a zir nasa thin hle a, boxing lamah pawh a naupan deuh lai hian amateur level ah All Ireland Youth Champion a ni bawk. Boxing lamah beiseina sang viau mahse; MMA game luhchilh chakna a nei chho a, UFC fighter Tom Egan-a hnuaiah training a nei chho ta a ni. Kum 18 a lo tlin chhoh takah chuan mahni inchawm pah a ngaih reng bawk avangin pipe chhe siam tein a inhlawh mawp mawp a, Ireland sawrkarin hnathawh tur neilo tana an dawn thin unemployment allowance dawng hialin harsatna a lo tawk thin.

Amateur Mixed Martial Arts Career

February ni 17, 2007 khan Amateur Mixed Martial Arts a khel chho tan a, hetah hian first round chhung lekin technical knockout-in hnehna a chang. Hemi hnu hian professional a luhchilh zui nghal a, kum 2008 khan Straight Blast Gym-a a training laiin John Kavanagh-a nen an inchhar fuh hlauh a, a coach angin a awm zui ta bawk.

Professional mixed martial arts career

March ni 9, 2008 khan professional MMA bout hmasa ber a khel a, hetah hian lightweight bout-ah khel a, hemi ah hian Gary Morris-a chu second round zawh hmain technical knockout-in a hneh a ni. Hemi hnua a fight pawh a chak zui bawka, nimahsela featherweight bout-ah khelh chhoh duhna a nei leh ta a, hetah erawh Artemij Sitenkov-a lakah submission-in a chaklo thung. Hemi hnu hian a chak chho tluang viau a, nimahsela vanduai thlak takin Joseph Duffy-a lakah a tlawm ta hlauh maia, beidawng duh lovin training a la nasa zual sauh sauh a, European MMA organisation lar tak Cage Warrior Fighting Championship-ah a rualin Lightweight leh Featherweight Champion a ni zui ta thung.

Ultimate Fighting Championship

February 2013-ah khawvela MMA organisation lian ber Ultimate Fighting Championship-ah contract a ziak a, hemi hnu thla hnih vel lekah UFC debut nei nghalin Marcus Brimage-a chu first round chhung lekin knockout-in a hneh a ni. Hemi hnu hian Max Holloway a hneh zui bawka, khawvel pum huapa MMA ngaisang tam tak te chuan a chanchin an ngaihven hle. Hemi hnu vela a fight-ah pawh hmasawnna lian tham tak tak hmuh tur a awm ta nuala, featherweight fighter rothap tak Denis Siver a knockout hnu phei chuan hetih hunlaia champion Jose Aldo nen title fight nei tura siam fel a ni zui ta a ni.

Interim Featherweight Champion

Mipui nghahhlelh em em Jose Aldo vs Conor McGregor thleng tura a lan laiin Aldo a inhliam hlauh a, championship match pawh khelh a ni leh ta lo. Chutih laiin featherweight no.1 contender Chad Mendes nena interim featherweight championship match hmuh tur a awm leh dawn si. Hetah hian Chad Mendes-a hian a wrestling game hmangin a nawr hle a, round 1 phei chu McGregor a talbuai thei hle tih a hriat. Nimahsela round 2-ah technical knockout-in a chak ta thung a, interim featherweight champion a ni zui bawk.

UFC Featherweight leh lightweight champion

UFC 194-ah Jose Aldo leh McGregor te chu featherweight unification bout-ah inbei tura ruahman a ni a, fight hmuhnawm tak tura beisei anih laiin second 13 chhung lekin Mcgregor-a hi knockout-in a chak a, UFC title bout-ah inhnehna rang ber a ni zui bawk. Hetih laia lightweight Champion Rafael Dos Anjos-a nen lightweight title fight nei tur an nih laiin Dos Anjos a inhliam hlauh a, match pawh cancel a ngai leh thung. Nimahsela Nate Diaz leh McGregor te chu welterweight bout-ah an intum ta thung a, second round-ah Nate Diaz-a hi rear naked choke-in a chak a, UFC bika McGregor a chakloh hmasak ber a ni zui bawk. Nimahsela hemi hnu hian Nate Diaz-a hi majority decision-in an rematch-ah a hneh leh tho a ni. Hemi zawh hian lightweight champion Eddie Alvarez-a chu 2nd round knockout-in a hneh a, UFC history-a awm ngailo a ruala weight category hnih champion a ni zui bawk.

Mayweather nen boxing match

UFC a khelh lai atang tawha tawng tam tak a ni ve bawk nen, khawvela boxer tha bera chhal Floyd Mayweather-a chu social media-ah a cho thu a sawi thin a, a duhthusam ang ngeiin boxing match-ah an intum zui ta bawk. May weather-a nena an inbeih hian a tir lamah chuan a nawr nasa hle a, defensive boxer hmingthang May weather a hnek fuh zauh zauh bawk. Round 10-ah erawh technical knockout-in a tlawm ta thung a ni.

UFC 229-ah Khabib nena inbei tura rin a ni

MMA lama a inlan tam loh tak em avangin a chawlhsan mai tura rinna a nasa a, lightweight title champion a nihna pawh an hlihsak hial. UFC lama a inlan tak loh em avangin Khabib Nurmagomedov-a chu a awm loh chhungin lightweight champion a ni zui ta a, chutih laiin UFC President Dana White-a chuan UFC 229-ah McGregor leh Khabib an inbeih ngei a ring. Nimahsela McGregor-a hi case nei lai mek a ni a, tuna a case neih hi a fel theih hlauh chuan Khabib leh McGregor intum hmuh ngei a beiseiawm hle.