Paulo Henrique Costa-a hi April 21, 1991 khan a lo piang a, tunlai MMA fighter zingah chuan boruak nei berte zinga mi niin; champion thei tura rinkai tak a ni bawk. Brazilian MMA fighter piang tawh zinga tha ber pawla ngaih a ni a, khawvel MMA organisation lian ber UFC-ah khel mekin, khawvel Middleweight fighter top 8 nihna a hauh mek a ni. MMA record pawh a nei tha hlea, mi sawmpahnih tum tawhin hnehloh a la tawnglo a, knockout leh submission hmangin a la hneh vek a ni.
MMA Career
Brazilian fighter Paulo Costa-a hian February 2012 atang khan MMA a luhchilh tan a, MMA a khelh theih nan hian remchang apiang thawkin a training na tur a intuak thin. Hemi hnu kum reilo te chhungin record a nei tha chho hle a, mi pariat a tumte a hneh veka, heng zinga pasarih chu knockout hmanga hnehin, a dang pakhat chu submission-in a hneh bawk.
Ultimate Fighter: Brazil
MMA fighter tha zawk nih a tum zela, hetiang dinhmun thleng tur chuan khawvel MMA organisation lian ber UFC-ah khelh chhoh a tum ta a, MMA fighter tha zawnna Ultimate fighter Brazil-ah thlan a ni ve hlauh maia, a duhthusam ram chu a zawh tan ve ta. Elimination round atang a che tha chho hle a, a vawikhat fight naah José Roberto-a chu guillotine choke-in a hneh. Hemi hnu hian Marcio Alexandre hmachhawn lehin, split decision-in a chaklo hlauh thung.
Ultimate Fighting Championship
March 11, 2017 khan UFC Fight Night-ah a inlan a, UFC Fight pangai a neihna tur a ni bawk nen, mi thar mah nise; MMA organisation danga a chet that tawh thin avangin mipui tam takin Octagon chhunga a inlan tur an nghakhlel hle a, UFC Fight a neih hmasak berah Gareth Mclellan-a chu first round-ah technical knockout-in a hneh. June 3, 2017 khan Oluwale Bangbose hmachhawn lehin second round-ah technical knockout-in a hneh zui bawk. November 4, 2017 khan UFC 212 neih a ni leha, hetah hian Welterweight Champion hlui Johny Hendricks-a chu second round-ah a hnek tlawm leh.
Fighter tha a hmachhawn lo tiin sawiselna a awm zuia, Hendricks-a chu champion hlui mah nise; weight hniam zawka champion hlui hneh chu thil ropui taka ngailo tawk an awm nuala, amah Costa erawhin tupawh hmachhawn tura a inpeih thu a sawi. UFC 226-ah Uriah Hall a hmachhawn leha, second round-ah technical knockout-in a hneh. UFC 230-ah UFC Middleweight fighter number 1 contender Yoel Romero a hmachhawn dawn a, hemi fight-ah hian a chak hlauh chuan title fight a neih thuai a rinawm ta hle.