​UFC Heavyweight Champion Daniel Cormier-a hringnun zin kawng

18th July 2018, 05:07AM

Daniel Cormier-a hi March 20, 1979 khan a piang a, MMA fighter anih hma hian wrestling a khel thin a, Olympic wrestler hlui a ni bawk. Tunah hian UFC light heavyweight leh heavyweight champion niin; khawvel MMA fighter zinga mahni tiat puia tha ber a ni mek bawk. Strikeforce Heavyweight Grand Prix Champion a lo ni tawh thin a, hei mai bakah MMA organisation King of the Cage Heavyweight Champion hlui a ni bawk. Khawvel MMA fighter piang tawh zinga tha ber pawla ngaih a ni ngei awm e.

High School Wrestling career

Daniel Cormier-a pa hi Joseph Cormier niin; a nu hi Audrey Cormier a ni thung. Kum 7 anih laiin a pa hi silai hmanga kah hlum a ni a, hei hian a nunah a nghawng nasa hle.

Cormier-a hi wrestler ni tura piang ve reng te pawh a tih theih ang. High School a kal lai atang tawhin wrestling champion a ni tawh thin. Wrestling a khelh thin lai hian a record pawh a tha hle a, hnehlo a nei mang ngailo a ni deuh ber. Kum 1995 khan khawvel pum huapa Greco-Roman Wrestling-ah bronze medal a la nghe nghe.

College Wrestling Career

High School a zawh hian Colby Community College a zawm a, heta tang hian national wrestling champion a ni chho ta bawk. Colby Community College atang hian Oklahoma State University-ah a insawn chho a, hetah pawh hian record a nei tha chho hle. Oklahoma State University atangin Sociology subject-ah degree a nei a, hemi hnu hian Freestyle Wrestling lamah hlawhtlinna a nei chho hle.

World Wrestling Championship

Kum 2003- 2008 chhung khan Senior U.S national champion a lo ni tawh bawka, khawvel pum huap Wrestling Championship-ah U.S aiawhin a lo kal tawh thin. Kum 2004 khan Olympics-ah semi final te pawh a lo thleng tawh thin a ni. Kum 2007 khan World Wrestling Championship-ah bronze medal te pawh lo dawng tawhin; mi tam takin wrestling tournament bika inelna sang bera an ngaih Golden Grand-Prix Ivan Yarygin, Russia-ah gold medal te pawh a lo dawng tawh bawk.

MMA a luhchilh tan

Kum 2008 Olympics zawh atang khan mixed martial arts khelh a tum chho ta a, fighter rothap tak tak Cain Velasquez, Jon Fitch, Josh Koscheck te nen American Kickboxing Academy-ah training a nei chho. Heta tang hian striking leh submission a thiam nasat phah hle a ni.

MMA career

September 2009 khan Extreme MMA-ah a khel chho tan a, professional fight a neih hmasak ber hian technical knockout-in a chak. Kum 2010 a thlen meuh chuan XMMA Champion a ni chho zui a, hemi hnu lam hian KOTC Heavyweight Champion a ni zui bawk.

MMA organisation Strikeforce-ah contract a sign a, heavyweight champion a ni zui ta bawk a ni.

Ultimate Fighting Championship

April 20, 2013 khan khawvel MMA organisation lian ber UFC -ah a khel chho leh. A fight hmasa berah hian UFC Champion hlui Frank Mir a hneh a, hemi zawh hian Roy Nelson-a lakah decision-in a chak zui leh. Hetih lai hian a thianpa Cain Velasquez-a chu UFC Heavyweight Champion a ni a, a fight that em avangin title fight a neih thuai rin a ni a, nimahsela thiantha te hmachhawn duh lovin light heavyweight lamah insawn a tum ta thung.

UFC Light Heavyweight Champion

Khawvel mipuiin Cormier-a light heavyweight khelh hun an nghakhlel a, light heavyweight huanga s khelh hmasak berah Patrick Cummins-a chu first round -ah technical knockout-in a hneh a, hemi hnu hian UFC legend Dan Henderson a hneh zui bawk. Light Heavyweight Championship-ah Jon Jones nen an intum chho a, decision-in a chaklo hlauh thung. Jones-a laka a chakloh hi MMA record-a a vawi khat tlawmna a ni zui ta bawk. Nimahsela Jon Jones-a chuan thubuai a nei chho a, vacant light heavyweight championship-ah Anthony Jonhson-a lakah submission hmangin a chak ta hlauh a, UFC light heavyweight champion a ni zui ta thung.

Title fight hautak

UFC Light heavyweight title a kawl hnu hian fighter rothap tak tak a hmachhawn a, Alexander Gustaffson-a nena an insual phei chu MMA fight awm tawh zinga hmuhnawm ber pawl a tih theih hial ang. Hemi tum hian split decision-in a chak hram nghe nghe. Hemi hnu rei vak lovah Anthony Johnson hmachhawn lehin; first round chhung zawng hian Anthony Johnson-a chuan striking hmangin a khawih fuh chiang thei hle a, nimahsela second round-ah Anthony Johnson-a hian wrestling a khel chho ta tlat maia, wrestling tawnhriat lo nei tawh Cormier-a chuan wrestler tha zawk anih zia a lantir a, submission-in a chak zui ta bawk.

Jon Jones rematch

UFC 214-ah Jon Jones nen title fight an nei leh. Hetah hian round 3-ah Jones-a chuan chiang zetin a lu lamah a pet fuh ta hlauh mai, Jones-a hian pet thlu zuiin; elbow hmang tangkaiin Cormier -a title a laksak zui ta bawk a ni. Nimahsela Jones-a chuan damdawi hman phalloh a hmang tih hmuh chhuah a ni leh si a, Jones-a hi kum eng emaw zat MMA khel rih loh tura a chungthu rel niin; Daniel Cormier-a chu light heavyweight champion a ni zui ta thung.

UFC Heavyweight Champion

UFC 226-ah Stipe Miocic-a nen heavyweight championship-ah an innuai a, mipui tam tak hmaah first round chhung lekin knockout-in a chak ta mauh mai, Miocic-a heavyweight title kawllai chu a chhuhsak zui bawk. Fight zawh hian Brock Lesnar-a chu Octagon chhunga rawn lut turin a ngen a, Lesnar-a hian rawn nam nghal deuh sawkin an incho dun hle a, thil lian tham erawh a thlenglo. Nakum velah Brock Lesnar vs Daniel Cormier hmuh te pawh a beiseiawm ta hle.

Copyright © inkhel.com 2024. All rights reserved.