Champions League Round of 16 1st leg match-ah Real Madrid chuan Santiago Bernabeu-ah PSG an mikhual a, mikhual lamin goal khung hmasa mahse Ronaldo goal hnih leh Marcelo goal khat hmangin Real Madrid chuan 3-1 in hnehna an chang.
League-ah che tha lem lo mahse Real Madrid chu Champions League-ah title humhim turin dinhmun tha takah an ding chho mek zel a, Ronaldo pawh league-ah goal khung hleithei lo mahse Champions League-ah erawh record thar a siam chhunzawm zel.
Ronaldo hian a zawnin match 7-ah ngawt goal a khung ta a, hetiang ti thei awm chhun niin Champions League-ah goal 116 a khung tling ta, ani aia goal khung tam mi dang an awm lo.
Real Madrid 3-1 PSG
(Ronaldo 45' pen, 83', Marcelo 86') (Rabiot 33')
PLAYER RATINGS
Real Madrid: Navas 7; Nacho 6, Ramos 6, Varane 7, Marcelo 7; Kroos 6, Casemiro 6, Modric 7; Isco 7; Benzema 5, Ronaldo 8… subs: Vasquez 6, Bale 6, Asensio 8.
PSG: Areola 6, Alves 6, Marquinhos 7, Kimpembe 7, Berchiche 6, Lo Celso 5, Verratti 6, Rabiot 7, Mbappe 6, Cavani 5, Neymar 6... subs: Meunier 6, Draxler N/A.
Inkhelh tan atangin Real Madrid chuan an nawr nghal, chance hlauhawm vawi hnih an nei phei nghal pang mai. Neymar pawh a tal na hle a, minute 13 an khel tling chiah tihin yellow card a chawi nghal der. Clear chance hmasa ber minute 28-ah a thleng. Ronaldo chuan mual veilam sir atanga Marcelo cross tha zet chu box chhungah changin a shot chhunzawm a, PSG goalkeeper Areola chuan a hmaiin a lo save.
33 mins-ah mikhual PSG chuan Santiago Bernabeu-ah away goal an khung ta tlat mai. Mual dinglam sir atanga Mpabbe cross chu box chhungah Neymar chuan lo tawkkawiin Rabiot tan pet nuam tak a ni a, Raboit chuan penalty spot hnung hret atangin cool takin a pet goal ta a ni. Real Madrid chuan an nawr letnghal, 38 mins-ah box dinglam sir atangin Ronaldo chuan chance a nei, mahse a pet over chiang hle.
First half tawp dawnah Kroos chuan penalty a hlawhchhuak, he penalty hi Ronaldo chuan goal-ah chantirin Real Madrid chuan an siphurh an rul ta nge nge a. Second half-ah game a tang hle a, chance hlauhawm Mbappe chuan box chhung atangin a nei nghal, Real goalkeeper Navas chuan a lo dan sak.
PSG-in chance hlauhawm an nei hnem zawk, hetih lai hian hun tawp lam minute 15 chhung erawh Real Madrid ta a ni ta thung a. Vázquez leh Asensio te chu Zidane chuan rawn luhtirin anni hian game an rawn thlak danglam chiang hle. 83 mins-ah Asensio chuan Ronaldo goal khung tur a rawn thawkchhuak nghal, box veilam atanga Asensio cross chu Areola chuan lo beng perin, hei hi Ronaldo chuan box chhung atangin a malpuiin a ti goal.
87 mins-ah Marcelo chuan Real Madrid goal thumna a khung, hei pawh hi bench atanga lut Asensio cross bawk a ni a, mual veilam sir atanga Asensio cross tha zet chu near post atangin Marcelo chuan a pet goal. Marcelo hian a pet sawh a vangin Areola tan pawh man a har hle nghe nghe a ni. Inkhel a zo a, 3-1 in Real Madrid chuan hnehna an chang ta a ni.
He match-a thil danglam rawn tlentu chu hun tawp dawn minute 11 a la awm tiha Asensio lut kha a ni a, minute 10 a khel tling vel chiah chiah, asssist vawi 1 a nei a, Ronaldo goal hnihna pawh kha a thawhrah liau liau a ni. Interception vawi 1 neiin pass vawi 8 a nei a, a cross vawi hnih kha a nih dan tur a nih thlap avangin cross accuracy 100% lai a nei a ni.