07 Dec 2017 12:01

inkhel

UCL-a record siamtu rawlthar duhawm Foden

India-in a thlen 2017 FIFA Under-17 World Cup-a Player of the Tournament lawmman dawngtu Manchester City midfielder Phil Foden chuan Champions League-ah record țha tak a siam a, English player zingah Champions League-a inkhel bulțan thei naupang ber a ni.

Kum 17 mi hian Nilaini zana Manchester City leh Shakhtar Donetsk in hmachhawn țumin inkhel bul a țan a, 2-1 in tlawm mahse mellung pawimawh tak a phun.

Foden hian Chelsea midfielder hlui Josh McEachran record lo siam tawh a khum a, Brentford midfielder ni mek McEachran hian kum 2010 November ni 23 khan Chelsea leh Zilina in hmachhawn țumin record hi a siam.

Foden hian kum 17 leh 192-a upa niin record thar hi a siam a, kum 2000-a piang zingah Champions League khel thei hmasa ber record a siam tawh bawk.

Foden pian kum (kum 2000)-ah hian tuna Bournemouth striker ni mek Jermain Defoe (kum 35 mi) chuan West Ham tan a goal hmasa ber a khung a, Manchester United pawhin a vawiruk nan Premier League nomawi an chawi ve bawk.

Kum 2000-ah bawk hian David Beckham, Michael Owen leh Alan Shearer-te telna England chuan EURO-ah beisei pha lovin an group-ah pathumna an ni a, tuna Foden enkawl mektu Manchester City manager ni lai Pep Guardiola hi he intihsiaknaah hian Team of the Tournament-ah a tel ve nghe nghe a ni.