19 Jun 2017 04:18

Inkhel

Mizo Sports Website hmasa ber

​UCL-a kan champion chuan Football ka chawlhsan tawh ang - David Silva

Manchester City midfielder David Silva chuan Champions League title an la a nih ngat chuan football chawlhsan nghal a tum thu fiamthuin a sawi.

Club level-a inelna sang ber chu Champions League a ni a, heta champion chu player tu pawhin an duh tih heta tang hian a chiang a ni.

Season liamta khan Manchester City chuan trophy chawi lovin an nil a, season tharah erawh ropui taka khelh theih Silva chuan a inbeisei a ni.

"Champions League title kan la a nih chuan ka chawl nghal ang. UCL hi ka tan chuan a pawimawhin a hlu em a ni," tiin Silva chuan fiamthuin a sawi.

Kum 2019 June thla thlenga City-a contract nei Spanish midfielder David Silva chuan, "Manchester City-ah hian ka hlim em em, a theih chhung chu City-a cham hi ka tum a ni.

"Ka hriselna leh mual chhunga ka chetdan azir a ni tawh anga, club-in min mamawh chhung chu City-ah ka cham ang.

"Season liamta khan trophy kan chawi lo, ka tan chuan kum tha a ni lem lo, hetih lai hian season tharah erawh trophy chawi ngei kan tum dawn a ni.

"Kan club-in kan tum chu trophy chawi a ni a, Premier League title la turin Pep Guardiola chuan kan mamawh players a dapkhawm mek a ni," tiin Daily Mail a hrilh.