South Asia Basketball Association (SABA) Qualifying Round for FIBA U-18 Championship chu Dhaka,Bangladesh-ah khelh a ni a, coach H Laldinsanga (Mapuia) enkawl Indian U-18 Men's Basketball team te an Champion.

India hian Gold an lakna kawngah Sri Lanka 112 - 53, Nepal 94 - 48, Bangladesh 107 - 47 leh Maldives 115 - 60 te hnehin India tan Rajeev Kumar chuan 104 Point khungin point khung hnem ber a ni a, India chakna kawngah hian a thawhhlawk hle a ni.

SABA Champion India chu FIBA U-18 Asian Championship, Asia khawmualpuia U-18 in elna lian berah a tling a, inelna hi Thailand- ah August ni 5 ațanga ni 11 hian neih a ni ang.

Tun țum SABA Championship-ah hian India team hi Mizo tlangval Pu HS Lalțanliana leh Pi Chalthanchhungi te fapa H.Laldinsanga (Mapuia) Saron Veng leh Aman Sharma, Jammu & Kashmir te enkawlna hnuaia khel an ni. Mapuia hi North East mai pawh nilo Eastern Indiaah hetiang dinhmun thleng thei hmasaber a ni bawk.

Mizo Basketball leh Mizoram tana mellung pawimawh tak phuntu Mapuia hi Mizoram Basketball Association chuan a chhuang takzet a, BFI Secretary General Pu Chander Mukhi leh Senior Officials dangte pawhin hmaichhanah ngei Mapuia hi fakin Mizo hming a ti țha takzet a ni.

Hetiang dinhmun a din theih nana hun remchang petu a hnathawhna DIET, Aizawl te, SCERT te, Directorate of School Education te, Mizoram State Sports Council te, Directorate of Sports & Youth Services Department te leh a theihna hria a amah duhsaktu Basketball Federation of India (BFI) te chungah Mizoram Basketball Association chuan thinlung takin lawmthu an sawi a ni.

Mapuia leh a naute thui tak thleng turin Mizoram Basketball Association chuan duhsakna sangber a hlan takmeuh meuh a ni.