Boxer rothap Tyson Fury chuan boxing ring luhchilh leh a rilruk a, vawiin hian a awm dan tur a puang chiang dawn niin an sawi.

Heavyweight champion thin Tyson hian Dusseldorf khawpuia November 2015 a Wladimir Klitschko a hneh hnu khan boxing hi a khel zui leh ta rih lo a. Inhnek hi chawlhsan mahse Tyson hian training a nei chho reng thung a, hei vang hian a tawh a la khirh hle ang tih a rinawm.

Vawiin hian London khawpuiah ‘Gypsy King’ hian a rawn kir dawn leh dawn loh chu a puang chiang dawn a. An sawi dan chuan kum 29-a upa Fury hian WBA, WBO, IBF leh IBO champion Anthony Joshua chu hmachhawn a rilruk a ni.

Boxing promoter Frank Warren chuan vawiina Tyson Fury thu puan tur chu Twitter lamah a lo tarlang ve bawk a ni.

Fury hian tun hnaiah a rihna a tihniam nasa hle a, a rawn kir leh a nih pawhin lar tak chu a hmachhawn thei nghal dawn lo a. A tir berah chuan top 15 a lang phak lo nen an inhnek phawt a rinawm.

Favang lai khan thuthang pakhatah chuan tawng nasa thei tak Shannon Briggs nen inhnek tur angin an sawi a. Tunhnaiah Joshua pawhin Fury pawh hi tawng hnem lutuk tiin a lo sawi ve bawk a, an pahniha an intawn hun a nghahhlelh thu a lo sawi bawk a ni.