12 Jan 2018 12:22

Inkhel

Mizo Sports Website hmasa ber

​Tunlaia right-back tha 10-te

Tehna hrang hrang hmangin magazine lian FFT chuan tunlai khawvela right-back tha 10 a thlang chhuak a, chungte chu:

10. RICARDO PEREIRA (PORTO)

Kum 2015 khan Porto atangin loan-in Pereira hian Nice a zawm a, Loan-a a chhuah hma kha chuan hmun a chang mang lo, thlak kual chhen a ni thin. A position hmasa chu right flank lam ni mahse France rama a inkhelh atangin full back atan chhawr a ni ta a.

Khawi hmunah pawh chhawr theih ang chi player kha ni mahse Porto-a a let leh hnuah chuan right-back position chu a chanpual a ni chhunzawm ta a ni. Kum 24 mi lek a ni a, ball a thiamin a chak em em a, attacking lam a pui tha em em thin bawk. Europe club lian lamin an melh tai tan hle, Tottenham leh Liverpool te chu amah duhtu nia sawi mek an ni.

9. THOMAS MEUNIER (PSG)

He Belgian defender hi 2016/17 season-ah kha chuan PSG-ah rinrawl a ni ngai lo, Serge Aurier leh Dani Alves-te aia thlan zawk erawh a ni zauh zauh, Meunier-a attacking game khelh dan hi PSG chuan ngaina em em lo mahse a position-a player tha awmte a nek chhuak chho thei ta tlat mai.

Alves hi kum 34 mi a ni tawh a, game tin a khel thei tawh lo, chuvang chuan Meunier hi rinrawl a rawn ni chho vat dawn. Defending lamah chuan a tha thlawt a, ball pawh a khuap thiamin a keng thei bawk. Tunah erawh manager Unai Emery chuan a la thlak kual rih a, mahse kum 2018-ah hi chuan PSG rinrawl a ni chho mai dawn.

A dawhthei a, a club-ah hmun a chang chho mek. Hetih lai hian club lian dangin an ngaihven chho mek zel a, regular taka a khel lo a nih chuan a chhuah mai rin a ni.

8. SIME VRSALJKO (ATLETICO MADRID)

2015/16 season chhung khan Sassuolo tan Vrsaljko hi a khel tha hle, Diego Simeone chuan a la ta chat a, Juanfran thlak nan Atletico Madrid chuan an hmang dawn ta a ni. Atletico Madrid chuan an tifuh kher mai, a khel tha thin em em a, hetih lai hian tun season-ah erawh inhliam avangin a inlan tam thei lo.

A rawn dam leh hnua league game hnuhnung a khelh paliah a rawn che tha kher mai, assist vawi thum lai a rawn nei hial a ni. Atletico hian an thlungbet nghet dawn niin a lang, Sime hian Juanfran a rawn pet chhuak vat dawn, Juanfran hi a upa chho tawh a, ani pawh a chawlh chhoh mai rin a ni.

7. STEPHAN LICHTSTEINER (JUVENTUS)

Kum 2016-a Dani Alves a luh hnu khan mi tam tak chuan Juventus Veteran Lichtsteiner hi hnawl a nih mai an ring hlawm. Hetih lai hian he Swiss defender hi a zam lo, 2016/17 season khan league game a khel hnem hle a, Champions League lamah pawh a inlan bawk.

Kum 33 mi a ni ve tawh a, nikum nipui khan Juventus a chhuahsan mai rin a ni tawh. Champions League squad-a telh ni lo mahse Italian club lianah a la cham chhunzawm zel a, tun season zawh rual hian Turin club hi a chhuahsan rin a ni.

Lichtsteiner hi superstar a ni lova, mahse a thawkrim em em a, chu chuan player tha takah a chhuah ta a, a tawnhriat tha tak tak te chu Juventus-in a chhawr hle a ni.

6. DJIBRIL SIDIBE (MONACO)

Season hmasaa Monaco-in Ligue 1 title an lak theihna chhan kha an attacking ropui vang niin khawvel chuan an hria, a dik hle, chutih laiin lang lo lama mi tangkai ber pakhat chu Sidibe hi a ni. Monaco chuan nikum nipui bazarah khan an player tha tak tak an chhuah nual a, hetih lai hian an club innghahna pakhat Sidibe erawh an chhuah phal ve lo.

Monaco hian season hmasa kha chu an phak lo teh meuh mai, chutih laiin Sidibe erawh a khel tha chhunzawm zel a, kumin hi World Cup neih kum a ni bawk nen, France Squad-ah a inpetluh ngei rin a ni.

5. KYLE WALKER (MANCHESTER CITY)

A hunlaia defender man to ber te kha ni mahse season hmasa kha chuan Walker hi a khel tha em em lem lo. Chutih laiin Guardiola hnuaiah hun a hmang rei ve deuh a, tunah chuan Manchester City innghahna a ni chho mek e.

Ball a thiam a, a tlanchak bawk a, tharum a ngah em em bawk a. Guardiola-a game khelhpui duh dan ang takin a khel thei bawk. Tun season Premier League-a ropui taka an khelh theihna chhan chu an tlarhnung phui that vang a ni kan ti lo thei lo.

4. ANTONIO VALENCIA (MANCHESTER UNITED)

Right winger a ni thin, right-back-ah pawh let a ni a, upat lamah player tha ber zingah a rawn invawrh leh ta. Mourinho chuan he Ecuador full back hi Manchester United captain-ah a hmang chho mek a, a chak a, a rang bawk a, counter attack neih nan a tangkai thin hle.

Tunah chuan a position luahlan thei tur United-ah an awm rih lo, kum 32 mi a ni a, rei tak chu a khel thei tawh dawn lo. Season hmasa khan Europa League-ah an champion, United player zinga khel tha ber pakhat a ni a, United player of the season atana thlan a ni nghe nghe a nih kha.

3. DANI ALVES (PSG)

Barcelona a treble pui hnuah Turin lam a pan, Juventus a pan kha tifuhlo inti viau mahse trophy chu a chawipui tho a. Nikum nipui bazarah khan Manchester City a pan dawn emaw tih laiin City a hnawl a, PSG a pan ta daih a nih kha.

Upat lamah PSG pan mahse khawvela right-back tha ber zingah a la tel thei reng tho a, tun season Ligue1 ah an vawklallen mek, Champions Laegue title han la ngat phei selang chuan a ropui zual ngei ang le. Kum 34 mi a ni ve tawh a, rei a daih tawh dawn lo, tun season hi ropui taka a khelh theih hun hnuhnung ber pawh a ni maithei a ni.

2. DANI CARVAJAL (REAL MADRID)

Natural right-back zingah chuan tunlai khawvela tha ber ti ila kan sawi sual lovang. Alvaro Arbeloa leh Danilo te awm mahse he position-ah hi chuan ani aia thlan tur Zidane-a'n a hre lo a nih kha. Season hmasaa ropui taka Madrid an khelh theih nan khan Carvajal hian tha a thawh hlawk hle a, full-back tha tak niin attacking a pui nasa em em thin bawk.

Zinedine Zidane chuan Carvajal thachhang dawl turin Achraf Hakimi a nei bawk a, ani hmel erawh kan hmu khat hle. Tun season La Liga-ah che tha vak lo mahse kum 25 mi Carvajal hi tunlaia right-back tha ber pakhat a ni mek a ni.

1. JOSHUA KIMMICH (BAYERN MUNICH)

Philipp Lahm a chawlh khan a hmunruak luah thei an vang khawp ang tih kha sawi dan a ni thin a, tunah chuan Bayern Munich hian Philipp Lahm an ngai tawh hauh lovang le. Tunah hian kum 22 chauh a la ni a, Kimmich hi midfield leh defence-ah chuan duh duhnaah a chhawr theih, hei tak hi a that zualna chu a ni.

Attacking lamah a thawh hlawk em em a, Bayern Munich-in domestic league an thunun em em theihna chhan pawh ani vang hi a ni kan ti thei bawk awm e. Ball ken kual leh khalh kawngah pawh ani aia tha an awm chuang lo, tunlai khawvela right back tha ber a ni ti pawh ni ila hnialtu an tam lem lovang.