13 Jun 2018 09:19

Inkhel

Mizo Sports Website hmasa ber

​Tu nge Real Madrid coach thar Julen Lopetegui chu?

Mi tam tak chuan Lopetegui hi kan hria anga mahse hrelo pawh a tam zawk kan nih a la rinawm. Chuvang chuan a chanchin tlem azawng han tarlang ila.

A hmingpum chu Julen Lopetegui a ni a, 28th August 1966 khan a piang. A inkhelh thin lai chuan goalkeeper niin, Spain National Team coach hna hi 2016 atang khan a chelh tan a ni. 2018 World Cup tan hma ni khat chiah a awm tawh tihin Spain chuan Lopetegui hi an National Team coach atangin an ban thu an puanga, Lopetegui hian Real Madrid chu an manager kalchhuak ta Zinedine Zidane aiawh turin thawhlehni khan contract an ziak tawh tih puan a ni.

A inkhelh lai hian La Liga -ah season 11 chhung vawi 149 khelin, club hrang hrang Real Madrid, Logrones, Barcelona leh Rayo Vallecano-te tan a khel kual a ni.

2003 atang khan Lopetegui hian manager hna a thawk tan a. Kum engemaw zat chhungin Spain youth team hrang hrang a enkawl a. Spain Under-19 leh Under-21-te chu European title a lo lakpui tawh a bawk a ni.

Lopetegui hi a inkhelh bul tanna chu Real Sociedad a ni a. Mahse Luis Arconada a nek chhuak zo lo a ni. Kum 1985 khan Real Madrid sawmna pawin kum 19 mi niin an B-Team- ah a lut.

Las Palmas -ah te loan-a a chhuah hnu pawhin Francisco Buyo chu a nekchhuak zo lo leh a, vawikhat chiah La Liga-ah Real Madrid tan hian a inlan a ni. Real Madrid hi chhuahsan lehin Logrones-ah a lut a, hetah hian a hlawhtling thawhkhat viau. Kum 1994-a Andoni Zubizarreta-a'n Barceloan a chhuahsan hnuin Barcelona chuan Lopetegui hi an la ve leh a. First choice a nih hleihtheih loh avangin Madrid khuaah kir lehin Rayo Vallecano a zawm ta a, Rayo-ah hian tawkfang tak a cham hnuin a retire chhunzawm ta a ni. Spain tan vawikhat chiah a inlan la, 1994 Spain World Cup Squad-ah a hming a tel ve a ni.

Lopetegui hian coaching lam hna a luhchilh hnuin Spain Under -17 assistant coach a ni a. Kum 2003 khan Rayo Vallecano enkawl zuaiin 2008-2009 khan Real Madrid B-Team a enkawl leh a. 2010 atanga 2014 chhungin Spain U19, U20 leh U21-te a enkawl leh bawk.

Kum 2014 khan Porto zawmin; Porto chu khami kum Champions League-ah quarter-final a thlenpui a. Tum anga Porto a chet thatpui theih loh avangin kum 2016 khan a hna atanga ban a ni ta a ni.

2016-a Spain coach Vicente del Bosque a chawlh hnuin Spain chuan Lopetegui hi an coach ni turin 21st July 2016 khan an ruai ta a, 12th June 2018 khan Lopetegui chuan World Cup zawh atanga Real Madrid a enkawl tur thu puan a ni a. Real Madrid nen hian kum 3 daih contract an ziak. A tuk lawk World Cup tan hma ni chiahah Spain chuan an coach Lopetegui chu a hna atanga an ban thu an puang ve leh nghal a ni.