01 Sep 2017 02:40

Inkhel

Mizo Sports Website hmasa ber

​Tun nipui bazara Premier League player man to te

Skyports leh BT Sport-in Premier League TV Rights to taka a lei hnuah Premier League club-te chuan sum an hmang hnem ta hiau hiau kher mai. Tukin zing dar 3:30 khan England-ah transfer window khar a ni a, tun nipui bazara Premier League player man to te tarlang ila:

Romelu Lukaku - £75m, Everton to Manchester United

Chelsea player thin a ni, loan-in a kal kual, Everton-ah permanent-in a khel a, a che tha kher mai, Everton tan game 133 khelin goal 71 lai a khung a, Chelsea chuan lak kir leh tum mahse Manchester United an rawn lang, United chuan Old Trafford-ah an senglut ta a, season bul a tan tha kher mai.

Alvaro Morata - £70m, Real Madrid to Chelsea

Manchester United leh Chelsea nena sawi zawm a ni a, United-in an la mai tawh dawn emaw tih laiin Real-in a man an chhiar to avangin Jose a inhnukdawk, Lukaku a la ta daih a, Lukaku man aia tlawmin Chelsea chuan an lalut ta thek a. Chelsea tan season bul ani pawh hian a tan tha kher mai.

Alexandre Lacazette - £52m, Lyon to Arsenal

A club hmangaih Lyon atangin Arsenal chuan an lalut tlat mai, Arsene Wenger-a game khelhpui dan tur nen a game a inmil nghal. Premier League-a a game hmasa berah goal a khung nghe nghe, Sanchez a chhuah loh phei chuan Arsenal team tha tak din nan Lacazette hi player tangkai tak a ni dawn niin a lang.

Kyle Walker - £50m, Tottenham to Manchester City

Season liamtaa an chak lohna tlar hnung lam thuam that nan Guardiola chuan defender a lei nual, khawvela defender man to ber a ni ta a, he kum 27 mi England international hi Mauricio Pochettino chuan a ui khawp ang le. Manchester City chuan team khawng tak an din chho mek niin a lang.

Benjamin Mendy - £49.2m, Monaco to Manchester City

Kum 23 mi lek a ni, season liamta khan Monaco tan ropui takin a khel a, Ligue1 title an la nghe nghe. Tin, Champions League-ah pawh tha takin a khel a, semi final an thleng hial bawk. Walker angin a physical em em a, City attacking a pui viau tura ngaih a ni.

Naby Keita - £48m (plus undisclosed premium), RB Leipzig to Liverpool

Liverpool dawrna a tirah hnar ren rawn mahse Reds chuan release clause £48m an thehchhuak takah chuan Keita an chang ta a. He central midfielder hi kum 22 mi lek a ni a, RB Leipzig innghahna hian Liverpool team a tihchak ngei a rinawm hle. Liverpool hian Chamberlain an lalut bawk nen, midfield khawng tak Reds hian an nei dawn niin a lang.

Gylfi Sigurdsson - £45m, Swansea to Everton

Gylfi Sigurdsson hi player tha tak ni mahse hetiang em ema Everton-in an lei hi chu mak ti pawh an tam hle. Iceland international hi Koeman chuan a thatna a hre chiang a niang, to deuh pawhin a lalut hem chu a ni a, Everton hian player an lalut nual a, anni pawh hi team khawng tak an ni chho dawn niin a lang.

Bernardo Silva - £43m, Monaco to Manchester City

Manchester City hi tun nipui bazara player lak nana sum hmang hnem ber an ni a, an hmatawng tih chak nan Silva hi Monaco atangin an lachhuak, season liamtaa Monaco-in Ligue 1 title an lak theih nan khan tha a thawh hlawk hle nghe nghe a ni.

Nemanja Matic - £40m, Chelsea to Manchester United

Chelsea-in Matic an chhuah phal mai hi football khawvel a barakhaih kan ti thei awm e. Chelsea team ti khawngtu ber zing ami a ni a, Manchester United tan pawh season bul a tan tha hle a, Chelsea tan chuan channa nasa tak a nih laiin United tan chuan rohlu a ni ringawt dawn.

Alex Oxlade-Chamberlain - £40m, Arsenal to Liverpool

Chelsea-in lak an tum, mahse Chamberlain hian central role play a chak zawk avangin Liverpool-a kal a duh thu a sawi. Chu veleh Liverpool chuan an dawr nghal chat a, transfer deadline day-ah an inlalut fel hman. Chamberlain hian Liverpool attacking pawh a pui dawn hle nia ngaih a ni.