12 Nov 2017 11:15

Serchhip Chelsea

TROPHY SPECIALIST WILLIAM LALNUNFELA

April ni 30, 2017 zan khan Aizawl FC chuan India ram sawinghingin I-League nomawi an chawi a, Indian football-ah bung thar ziakin theihnghilh tawh ngailoh tur chanchin chhuanawm tak an hnutchhiah.

Aizawl FC hian an game hnuhnung berah champion turin a chhe berah point khat an mamawh a, Jawaharlal Nehru Stadium, Shillong-ah Shillong Lajong hmachhawnin an mamawh point an hlawhchhuak a India hmarchhak club zinga I-League champion ni thei hmasa ber an ni zui bawk.

Aizawl FC hian Lajong hi 1-1 in an inhnehtawkpui a, Shillong club hian goal an khung hmasa nghe nghe a hunrei vak lo chhung chu Aizawl FC dinhmun a chhe hman ti ila kan sawi sual lutuk lo ang.

Inkhel dangah champion la beisei pha ve tho Mohun Bagan-in Chennai City FC lakah 2-1 in hma an hruai a, Aizawl FC hian Lajong hi hnehlo in Bagan hian hnehna chang se Kolkata lamah I-League nomawi a awm ang.

Minute 67–naah Aizawl FC hian goal an nei ve ta a, William Lalnunfela chuan goal khungin JN Stadium-a an fan-te an sapatal bakah TV atanga lo entu Mizo tam takin lawmin an au a Aizawl khawpui pheichu ‘a nghing’ luih luih hi a ni ber mai!

William-a goal hian Aizawl FC hi I-League nomawi a chawi tir a, mumang ramah Mizote a len tir bawk.

Kolasib tlangval hian a football zinkawngah nomawi a chawi hnem tawh hle a, chakna goal pawh a khung thei viau bawk.

(inkhel.com)

A HUN HMASA LAM

William Lalnunfela hi Mizoram hmar lama awm Kolasib-ah kum 1995 July ni 6 khan alo piang a, a pa chu Lianhlira niin apa hian kumin (2017) March thla khan chatuan ram a pan.

Naupangte anih ațangin William hian football a ngaina em em , kum ruk mi vel anih ațangin football a pet țan a an school tan pawh a khel thin bawk.

Kolasib Hmar Veng High School-ah lutin he High School hi Inter-District High School-ah a champion pui nghe nghe a, hei hi Mizoram pumhuap intihsiaka a khelna team a champion pui hmasak berna a ni.

A hun hmasa lamah hian an khaw club leh veng tan a khel țhin a, kum 2011 khan Red-Ribbon Inter-Village Tournament-ah Kolasib Vengthar Village Council tan țha takin a khel a, Vengthar VC team hi knockout stage luhpuiin an player pawimawh ber pakhat a ni nghe nghe.

Red-Ribbon Inter-Village Tournament a khelh țhat vang hian hetih hunlaia I-League club Pune FC chuan an club-a lut turin trial an neihpui a, Pune FC Academy-ah hian kum 2011 leh 2013 inkar khan awmin Under-20 I-League-ah a zawnin season hnih a champion pui a kum 2013 goal khung hnem ber a ni nghe nghe.

(inkhel.com)

SENIOR TEAM-A A SULHNU

Pune FC Academy-a a in zirchhuah hnuin kum 2013 khan Mizoram lamah kirin Chanmari FC a zawm a, Chanmari FC hi kum 2013-2014 season khan Mizoram Premier League (MPL)-ah a champion pui a, MFA Super Cup-ah a champion pui zui leh bawk.

Kum 2014 khan Mizoram team chu Santosh Trophy-ah a champion pui a, hei hi Mizoram football-a theihnghilh tawh ngailoh tur zinga pakhat anih bakah Indian football-a Mizote min phochhuaktu langsar ber tih ngam a ni tel.

Mizoram team hian kum 2014 March ni 4 khan final-ah si thum faiin Railways an hneh a, Kanchenjunga Stadium, Siliguri-a inkhelah hian Mizoram tan Zico Zoremsanga chuan goal hnih khungin F. Lalrinpuia'n goal khat a khung ve bawk.

MPL-a a season khatnaah nomawi a chawi nghal vang leh a khelh chhiatloh avangin Aizawl FC chuan kum 2015 khan an lalut a, The People’s Club hi MPL-ah a champion pui nghal a; 2nd Division I-League-ah Aizawl FC hi chetțhatpui bawkin I-League khel turin a tlinpui.

I-League-a an season hmasa berah Aizawl FC hian table mawnglam an luah a, an relegate bawk. Hemi season-ah hian William hi Aizawl FC player chhawrrim a ni pha lo va, game hnihah in lanin player langsar a nilo.

MPL 2015-2016 season-ah William hian Aizawl FC chu MPL nomawi a chawipui leh a, a zawnin MPL-ah an champion a MPL chanchinah a zawna champion thei hmasa ber an ni.

2016-17 season I-League-ah William hian Aizawl FC chu a champion pui leh a, an champion-na goal pawh a khung a India ram sawinghing lawih tham sulhnu an siam.

2016-17 season I-League-ah hian game riat khelin goal khat a khung a; a goal khat neih hi Aizawl FC-in champion nomawi an chawi theihna goal a ni thung a, a hlut dan a danglam hle.

(inkhel.com)

KA HUNTAWNA NUAM BER….

inkhel.com-in a huntawna nuam a tih ber lai kan zawhna chhangin William chuan, “Santosh Trophy-a kan champion kha a ni a, kha kha football bika ka huntawn tawhah chuan ala nuam ber.” tiin a sawi.

(inkhel.com)

CHAMPION-NA GOAL KHUNG THEI

Kum 2015 khan Aizawl FC-in Independence Day Football Tournament-ah champion nomawi an chawi a, final-ah 3-0 in Bethlehem Vengthlang FC an hneh.

He inkhelah hian hun pangngaiah 2-2 in an inhnehtawk a extra time khelh niin Aizawl FC hian goal an khung a an champion.

Aizawl FC champion-na goal hi minute 111-naah William Lalnunfela chuan F Lalrinpuia (Valpuia) siamsak ațangin a khung a Mizoramah an țha ber tih an lantir.

William hian kum 2015 khan Inter Branch YMA Tournament-ah Armed Veng a champion pui a, final-ah Lengpui si khat faiin an hneh a an champion-na goal hi minute 21-ah a khung bawk.

Champion-na goal a khungna pakhat chu Lajong an hmachhawn țum ami kha a ni a, a goal khung hlut dan kha chhut thiam harsa khawpa hlu a tling.

Thil chhinchhiah tlak deuh pakhat chu, William-a hian kum 2013 ațang khan kumtin Trophy ala chawi ziah tih hi a ni.

(inkhel.com)

TROPHY A CHAWI TAWHTE:

1. Mizoram Premier League (3) :  2013-14, 2014-15, 2015-16

2. MFA Super Cup : 2015

3. MFA Cup

4. Independence Day Football Tournament : 2015

5. Dr. T Ao Football Championship : 2014

6. National Games : 2015

7. Santosh Trophy : 2014

8. Central YMA Football Tournament : 2015

9. I-League 2nd Division : 2014

10. Hero I-League : 2017

11. Inter-District High School Sports

(inkhel.com)