Tlawm lo rei zual club panga

18th April 2018, 11:04PM

Hmanni lawkah Barcelona chuan record thar an siam a, La Liga-ah a zawnin game 39 chu hneh loh an nei tawh lo a ni.

Champions League atangin Roma chuan pet chhuak mahse, La Liga lamah chuan Barca hian Ernesto Valverde hnuaiah hneh loh an la nei lo a, tluk loh erawh pathum an la nei thung.

Europe khawmualpuia league hrang hrangah hetianga hneh loh nei lo rei zual te han thlir kual ila.

Ligue 1: Paris Saint-Germain - 36
France rama an league ropui berah PSG chu record dinglai chelh mektu an ni a. 2015-2016 season khan Laurent Blanc chuan PSG hi a enkawl fuh hle a, match 36 chhung chu hneh loh an nei miah lo a, trophy pathum ngawt an la nghe nghe a. February thlaah Lyon an hneh lo a, an kal tluang lai a tawp chauh a. Zlatan Ibrahimovic chuan Ligue 1 goal 44 zet a thun a, PSG tana goal thun hnem ber a ni.

La Liga: Barcelona - 39
Catalan club lian Barca hi Valverde hnuaiah an che fuh chho hle a, an star pakhat Neymar awm tawh lo mahse Lionel Messi an neih miau avangin dinhmun sang takah an din theih phah zel a. Pathianni khan Camp Nou-ah Valencia chu 2-1 in an hneh a, La Liga bikah game 39 chhung chu hneh loh an nei lo a ni.

Premier League: Arsenal - 49
Arsenal hi Premier League bikah chuan season tluanchhuaka hneh loh nei lo ni thei hmasa ber an ni a, ‘The Invincibles’ tih loh chi an ni lo. Game 49 chhung chu tumahin an hneh thei lo a, game 50-na turah an hmelma Manchester United nen an inkhel a, an chak ta lo hlauh a ni.

Bundesliga: Bayern Munich - 52
Pep Guardiola hnuaia an season hmasa berah Bayern Munich chu an tlawm lo rei hle a, match 52 chhung chu hneh loh nei loin an kal ngar ngar a, Augsburg chuan 1-0 in an hneh a, October 2012 atanga hneh loh nei loa an kal tluang hi an titawp ve hram.

Serie A: AC Milan - 58
Europe khawmualpuia league lian panga zingah chuan Serie A record hi a rei ber a ni a, 1990 chho vel khan AC Milan chuan match 58 chhung zet chu hneh loh an nei lo a. Arrigo Sacchi hnuaiah Milan chu football chanchin awm tawhah chuan club tha bera sawi an ni a. A nihna takah chuan hetianga record tha neihpui theitu tak chu Fabio Capello a ni a. Rossoneri hi Italian pachal Capello hian a zawnin Seria A title hi vawi 4 a lakpui a, 1993-94 season khan Greece-ah Barcelona hnehin Champions League title a lakpui bawk a ni.

Copyright © inkhel.com 2024. All rights reserved.