Thla 31 hnua kir leh Tyson Fury a chak awlsam

11th June 2018, 01:06AM

Tyson Fury chuan kum hnih leh a chanve chuang hnuah boxing ring a luhchilh leh a, a khingpui Sefer Seferi chu a hneh.

Manchester Arena-ah Tyson Fury leh Sefer Seferi te hi an inhnek a, harsa lo takin Fury hi a chak . A hmain Fury hian boxer ropui pahnih Muhammad Ali leh Floyd Mayweather te nen a lo intehkhin tawh a, Seferi nen hian an inlenhleih hle a, round 4-naah Fury hi a chak a ni.

WBA-IBF-WBO world heavyweight champion hlui hi an inhnek tirh atangin a tal buai lo hle a, Seferi lak atangin thil buaithlak a dawng lo viau a. Round 4-naah Seferi hian a duhtawk a, Tyson Fury chu chaka puan a ni.

November 2015 khan Fury hian Wladimir Klitschko chu hnehin world heavyweight title pathum a neih theih phah a, hemi hnu hian a reh ta vang vang a, tun tum hi a rawn inlar leh hmasak ber a ni.

An inhnek zawhah Fury chuan, “Nuam ka ti khawp mai a, boxing ka khelh tirh ang mai kha a ni berin ka hria,” a ti a.

“Boxing ring ka luhchilh lo rei hle a, inhnek rei kha ka duh a, chu vangin hun ka pawt sei lui a. Ka tumpuite hi an khirh chho tial tial dawn a, a lehpekah chuan tun tum aiin ka chet that zawk a ngai ang,” a ti bawk.

Promoter Frank Warren chuan August 18 khian Windsor Park, Belfast ah Fury hi inhnektir leh a rilruk mek a. A ruahman dan anga a kalpui thei a nih chuan WBO interim featherweight champion Carl Frampton nen an inhnek ang.

Tun atanga thla ruk chhungin German boxer, WBA title kawl mektu, Manuel Charr pawh Fury nen hian an inhnek thei tho bawk a. Klitschko a hneh tuma a khawih nat ang kha Seferi nen an inhnekah chuan a awm lo deuhin a hriat a, mahse a thiamna erawh a la pangngai reng thung a, Fury hi dah hniam mai chi a la nih lohzia a lang.

Feet 6 leh inches 9 a sang English boxer hian boxing ring luhchilh leh tura a inpuahchahnaah pound 112 ngawt a hloh niin a sawi a. Klitschko nen an inhnek hnuah pound 276 zeta a rih belh avangin a rihna hi tihhniam belh a la ngai hle tih a sawi.

Tyson Fury hian WBA-IBF-WBO champion, English boxer Anthony Joshua leh American boxer, WBC champion Deontay Wilder te hmachhawn a la tum hle.

Copyright © inkhel.com 2024. All rights reserved.